終於黎到墾丁篇，第一集會介紹大家點樣去墾丁先，因為其實好多人都好熟墾丁架喇。之後幾個星期，我會深入墾丁嘅唔同景點，教大家食得好玩得好。 墾丁係台灣嘅最南部。呢度無高樓，無繁華嘅街道，兼好鬼死遠（離高雄兩個半小時車程），仲有個未爆炸嘅核電廠添。不過，自從N年前嘅一套「海角七號」同埋一年一度嘅墾丁春吶之後，墾丁就出名起黎。 香港人成日話「去墾丁」，其實筆者覺得係一個統稱。事實上淨係計墾丁呢個地方已經包含左好多景點，包括鵝鑾鼻，風吹砂等。再加埋周邊嘅小城，應該有荃灣到屯門咁大範圍。 我地睇下地圖先： 大家集中睇地圖紅色嘅字就可以了。 1）　四重溪——一個專門浸溫泉嘅地方，呢度除左有大大小小嘅溫泉酒店之外，仲有公共溫泉浴室，完全免費。可是一般來說，四重溪係台灣本地人去嘅比較多，香港人搭得兩個幾鐘車嘅話，都集中去晒墾丁玩了。（由四重溪搭的士去墾丁大街約半個多小時） 2）　車城——呢個地方仲少香港人去，呢度係一個古城，有間好出名而有好老嘅廟叫做福安宮。 3）　恒春——去得墾丁的話，都必定會到一到呢個地方，恒春係一個好細嘅城市（應該叫古城），有老街行，有野食有便利店，仲有警署。好安全的。再加上恒春有一個好出名而又好多年青人鍾意玩嘅野，就係玩火！恒春旁邊有個叫「出火」嘅地方，專門比你玩煙花的。仲有個全亞洲最大嘅海洋生物博物館同埋玩半浮潛艇嘅貓鼻頭。另外，海角七號就係喺呢度拍架喇，想搵景點嘅話就等睇往後恒春篇時再講。跟住沿住恒春一路往墾丁嘅馬路兩旁，有好多唔同嘅刺激玩意：賽車、草地滾球、大腳八四驅車飛沙漠等。所以去墾丁的必定會去埋恒春。 4）　墾丁——墾丁有無限嘅陽光與海灘，仲有過百間民宿同三間酒店（民宿我會另開一篇文章介紹）如果你放大上面張地圖黎睇嘅話，墾丁其實由一條 V字型嘅馬路而連成的。所以想一天遊也好，兩天遊都好，沿路玩到尾就可以。墾丁包括左以下幾個較為出名嘅景點：墾丁大街、墾丁公園、船帆石、鵝鑾鼻、台灣最南點、龍磐公園（幾年前HotCha個永城廣告呀！）、風吹砂，同埋港口吊橋。 前往墾丁方法： 一般黎講，我地會由高雄市（你間酒店或者機場）或左營高鐵站前往墾丁，另外屏東都有公車去恒春的（香港人應該唔會住屏東亦都唔熟屏東掛？）。 而前往墾丁嘅方法得兩種，一係搭公車(約兩個半小時 )，一係搭的士(約一個小時45分鐘）以下有詳細嘅介紹。 1）墾丁快線 墾丁快線公車，由左營高鐵站門口來往墾丁，班次約15分鐘至半小時一班。車費為NT$383。車程約兩個半小時。營運時間係朝八晚七時，兩邊總站嘅營運時間都係差唔多一樣。如果以上時間以外嘅話，唔駛驚，有通宵公車的，我唔知幾錢，不過要站站停，車程約三小時！ 2）共乘的士 說實話，我真係唔會介紹你搭公車去墾丁，一黎你唔熟路，唔知邊間民宿邊個站落。二黎車程太耐，人有三急咁點算？所以都係搭的士啦。一兩個人怕搭的士好貴? 唔怕！高雄有「共乘的士」（又稱併車）的，即係香港我地叫嘅泥鯭的士。車程約一個小時45分鐘。每人收費約為NT$350-450。視乎上落車嘅地點而定。唔知邊度有得搭嘅話，好簡單，又係去左營高鐵站門口，就有條長長嘅的士等緊你，你行埋去問係咪去墾丁就可以。而跑墾丁線嘅的士一般都係七人車，所以如果你一行四至七人，又驚同人SHARE一部的士嘅話，咁不如包車啦。包車價錢一般NT$2500。（記得要預行李位置，因為七人車坐盡嘅話就無位放行李架喇。如果你真係七個人去嘅話，就要租9人車，價錢約為NT$3500。 不過當然，如果你唔放心同陌生人搭的士，又或者驚的士司機信唔過嘅話，你訂民宿嘅時候，佢可以安排車接你的，價錢同包車相近。咁我去墾丁又坐咩車？梗係坐朋友3A租車安排嘅共乘的士啦，所有我嘅朋友去墾丁都係搵佢，你只要話比佢知你邊日幾點由邊度出發，佢就會安排架喇。 墾丁市內交通 講起墾丁市內交通呢個話題就真係最麻煩，每位第一次去墾丁嘅朋友都好擔心呢個問題，而我嘅建議只有一個，就係租電單車。事關墾丁的確好大，例如由墾丁大街去恒春古城，約10公里路程（即是一條屯門公路咁長）。所以雖然有單車你租，但係好明顯係唔可行嘅事。不過咁，今日寫得呢篇文章就梗會比幾個方法你嘅，唔係嚇到無人敢去墾丁了. 1)墾丁街車 其實即係墾丁公車，同墾丁快線係同出一門的，不過就淨係穿梭墾丁、恒春、四重溪呢幾個地方。班次約30分鐘一班，車費係一日任搭NT$150。可以帶埋單車上公車，不另收費。不過，由於班次較疏，另外部份景點，你係需要喺恒春站轉車的，所以，呢個方法當我無講過吧。

包車一天遊

2）包車一天遊8小時無論你租民宿也好，酒店也好，佢都會主動推介呢個服務比你。包車一天玩8個鐘，收費大約NT$3500。景點佢會安排好比你架喇。一般黎講我下幾篇文章將會介紹嘅景點都會帶你去到。唯一唔好處就係每個點你玩唔耐，例如你總唔可能叫司機等你一個鐘頭玩賽車吧，否則你就會少左一個鐘頭包車遊。不過呢個方法對第一次去墾丁的朋友非常好，你第一日去到可以當認識下當地嘅地方先，第二日再自己搭的士去你想去玩嘅景點。如果你搞唔掂，又或者唔想要民宿安排嘅包車遊嘅話，都可以找我朋友3A租車，筆者勝在朋友多。哈。 （提提一句，有網友反映近年民宿安排嘅包車質素參差，最常見嘅係，部車唔係你包左的，司機會放低你在某個景點，然後走左去車第二團。就算你話唔想睇某個景點，又或者你想行一陣轉個頭就走都唔可以，因為部車走左了。所以唔好再貪平，找我朋友吧，有問題仲有我比你出氣。）

電單車放心揸

3）租車 / 電單車（筆者最愛）最後，最自由，而筆者最愛嘅方法，就係租車了（筆者租電單車的）。上文講過，墾丁其實係由一條好長嘅 V 字型街道所連結成，所以真係唔駛怕迷路。這是不可能的事。但係如果你無車牌或者國際車牌咁點算呢？睇下面： 呢部就係我口中所講嘅電單車了。無錯，佢其實算係一部單車，不過係電動嘅單車而已。所以無車牌都可以騎。我每次去墾丁都係租呢種電單車載埋我老婆周圍去的。日租每天（6小時計）約為NT$700-800。你只要識踩單車就應該踩得掂佢架喇，部車有車頭燈、有響安、有指揮燈，開到盡大約30km/h，但係筆者落斜時開到60km/h都無問題。放心啦，白天嘅墾丁，路又闊，車又少，無事的。夜晚行墾丁大街就另計。另外提提大家一句，呢款車其實係要一人一車的，不過我就梗係乜都得啦，朋友多，呵呵。 下星期開始，我就會一連幾星期為大家介紹恒春、後壁湖、墾丁大街同鵝鑾鼻等等嘅景點。以下係上文介紹過嘅交通工具網頁，下星期日見！ 3A租車網頁：http://threea.pixnet.net/blog 墾丁快線網頁：http://www.taiwantrip.com.tw/busline_post_s10.html 墾丁街車網頁：http://www.ptbus.com.tw/03/0302a.htm 圖：由作者提供，部份相片取材自墾丁街車及墾丁快線網頁。

投票已截止，多謝支持