朋友：「有冇睇兩個年青人創業開食肆嗰單新聞？」
筆者：「冇喎！講咩架？」
朋友：「嘩！咁你都唔知，洗晒版喎！」
筆者：「做咩生意？」
朋友：「食肆…屋企人投資咗110萬，月蝕2.7萬！」
筆者：「食肆係難做架，又辛苦，支出又大，食邊瓣？」
朋友：「咪好似我哋去台灣嗰啲多餸飯自助餐囉！」
筆者：「哦~~嗰啲正喎！我去親台灣都食架啦。」
朋友：「勁蝕呀！最衰都係香港啲租咁貴…」
筆者：「租貴就梗架啦，不過唔一定淨係租金問題，收幾錢？」
朋友：「18蚊10個餸…」
筆者：「吓？！18蚊?！台中都唔得啦！」
年青人有自己的夢想是好事！勇於創業是好事！
然而必須要一個思維，創業不容易，需要知識與經驗！
筆者都係過來人，10年前就開始創業，試過跟不同的人合作，做過很多不同的生意，有廣告製作、美容纖體、密室逃脫、足球場館、裝修工程、酒吧食肆、網站商貿等等，都唔記得開過幾多間公司，十幾廿間一定冇走雞，當中比較成功的是投資教學、物業投資，其他的業務，老老實實唔算得好成功，蝕錢的經驗都唔少，好在近年物業投資賺到不俗回報，足以支持筆者追尋理想。我好想、好想講的是，創業是高深的學問！
很多年青人以為，只要有一個好的意念，有點錢，就可以創業！
其實經營一門生意，有很多學問，租地方只是其中一個元素，還有市場定位、產品服務、市場推廣、日常營運、人事、管理、財務、銷售、供貨、客戶管理、法律責任等等，每一樣都是一個學位課程，最可怕的是…由小學、中學到大學，根本就沒有教過！
就好似這兩位年青人，將台灣的多餸飯自助餐引入香港…
租舖出事…揀個個凹型舖，廚房擺咗門面，可見的座位數目不多，令到途人以為冇位，行過都唔入嚟。
擺位出事…食物雪櫃放在門口，曬住啲食物，要勁開冷凍。
定價出事…不同食物劃一價錢，個個揀晒貴嘢，又蝕。 客服出事…有識揀識食的客人，十幾蚊就落樓，圍唔到數，又有客人挾餸多了，埋單發覺很貴，食淨很多，下次就不來了。
預算出事…沒有足夠資金，沒有準確預算，蝕半年就話做唔住。
總之幾乎每一個部份都出事，好明顯知識與經驗不足。
咁都唔蝕真係冇理由，可唔可以認真學習吓先呢？
唔好淨係識得話租貴，租金無可否認係重要支出之一，如果你好好生意都要蝕就話啫，而家係連生意都唔夠，運作管理都搞唔掂，係咪應該諗闊啲呢？首先係定價方面，係咪要收番高啲呢？成個生意策略，係咪可以搵前輩俾吓經驗呢？
年青人創業，筆者建議先別急於做成本重的。
例如一些服務性行業，講座再詳談……
1% Anthony
Fan Page《第一桶金》：www.facebook.com/anthony.wealth
圖：http://history.n.yam.com/liontravel/food/20130515/20130515478581.html
投票已截止，多謝支持
返回
