朋友：「鋤價兩成？會唔會俾人覺得你玩嘢？」筆者：「咁你係咪玩嘢？定真係想買先？」朋友：「我真係想買架！」筆者：「咁咪係囉，其實鋤價兩成......好正常丫！」朋友：「即係開價 450 萬鋤佢 360 萬？」筆者：「當然要視乎情況，好多時應該要咁做！」朋友：「會唔會俾業主鬧架？」筆者：「代理傾之嘛，又唔係你傾，鬧都係鬧代理啫！」朋友：「咁代理實唔肯同你傾啦，實當我黐線啦！」筆者：「你都要表現出誠意......」
筆者一向喜歡湯文亮博士的文章，不過就唔係每篇都讚同......然而，不同的人、不同角度，就有不同意見，今個星期想分享一點讚同，一點反對，純粹意見交流，絕無惡意，先講讚同的：湯博士建議買家可以大膽還價，鋤價兩成亦不為過！
很多業主開價，本來就已經開高一成！過去一年的升市寵壞了業主......不創新高，誓不罷休！例如早兩三個月，筆者有朋友看上了東九龍某幢大廈，翻查之前的成交紀綠，同一幢大廈質素相若的單位，年初的成交是 350 萬，當時有兩個放盤，一個質素較佳的，叫價 398 萬，好多人睇；另一個質素較差的，反而叫價 408 萬，擺咗幾個月都冇人還價。之前氣氛熾熱，所謂業主市，到處都有這種情況，鋤價幾多？
當日氣氛熾熱──你唔買，大把人爭住買，業主自然企硬！今天氣氛逆轉──仲唔趁機會狠狠殺一刀，還待何時？以 408 萬的單位為例，還價 10%，仍然要 367 萬，仍然不算好價；還價 14%，才是 351 萬，少算沒有買貴。假如你的目標是之前的成交價 350 萬，就不能開 350 萬。因為業主不會笑著跟你說：「好呀！我就係等你呢個有緣人！」咪玩啦！如果業主真係想賣，通常都會跟你討價還價，返過羅湖購物的朋友都知道，甚麼叫開天殺價，落地還錢，你的開價必須低於 350 萬，例如 320、330 萬，才有機會達標，相等於開價的 20%。
假如大家都覺得跌市周期展開，將目標定為 320 萬甚至更低亦不為過，不過一般散戶很難做到，低於市價 10% 至 20% 的筍盤，通常代理會自己先要，自己食唔晒，就會俾相熟的炒家或投資者。
當然不是所有情況都適合鋤價 20%，要視乎氣氛、開價、競爭對手，還價的時候亦要講誠意、講理據、講技巧，講座再跟大家詳細分享。
1% Anthony
Fan Page《第一桶金》：www.facebook.com/anthony.wealth
投票已截止，多謝支持
返回
