【HKG訊】資訊科技界選委「IT Vision」和立法會議員莫乃光昨晚舉行的選舉論壇，邀得曾俊華及胡國興出席。眾所周知IT界一向是泛民重鎮，胡官獲該界別8個提名，John曾更獲21個兼莫乃光本人的提名，故2人可說是「主場作戰」。主辦方亦好識做，選舉論壇仲梳乎過「城市論壇」，無雙方對質環節，連Cap張一齊講吓嘢嘅圖都難，而且搭晒炮台畀位他們攻擊沒有到場的林鄭月娥。

疑似失言 會後稱「講笑」補飛

在連續缺席兩場論壇後，John曾昨晚終於畀臉「處女下海」，首次出席論壇。點解咁Like論壇呢？John曾自己開估。主持人問到他是否期待3名候選人同場較量時，John曾竟表示「唔係特別期待」，更反問「有咩好傾啫」？他更指自己睇過晒對手嘅政綱，「睇唔到有咩特別」。會後被問到為何不期待3人同場時，John曾可能自知失言，改口話 「我講笑咋！我哋會（同場）嘅。」 另外，有選委問會否檢討「不誠實使用電腦罪」，John曾耍幾下太極，僅表示若這條法律有很多缺憾，應透過諮詢各界再修改。

胡官唔識IT 選委所託非人？

胡官則延續得把口的本色，被觀眾問到「tech startup」最需要什麼、對現在「tech startup」配套有何改善之處時，竟然夠膽死走去問主持「乜嘢叫tech startup」，再坦言「呢個你就問倒我嘞」、「我真係唔知」，並死撐後更辯稱「我就係想聽你哋意見」。 更搞笑的是，胡官如此無知，莫乃光突然間「好人」上身，不斷鬆章，耐心同胡官逐啲解釋。可恨的是胡官並不領情，求其答句「新嗰個科技局（創新及科技局）應該要處理呢啲問題」，指若業界面對這些問題，應「寫封信」向當局反映。真不知道IT界人士聽到胡官這句話有何感想？提名他的8大選委會不會覺得所託非人？ 論壇還發生了一段小插曲，在曾俊華講嘢時，有勞工界示威人士高呼「唔做IT狗，我要立法標準工時」，結果被保安請離場。 圖：無綫新聞截圖

投票已截止，多謝支持