台灣地區領導人蔡英文不久前係民進黨中常會指出，大陸軍機不斷侵擾台灣西南空域，已經嚴重破壞區域和平穩定，成為國際社會關注的議題。身兼民進黨主席嘅小英就話喇：我要正告北京當局，務必要有所克制，避免擦搶走火。

筆者不禁大笑三聲，小英嘅所謂「成為國際社會關注的議題」，咪就係向美國佬求救，乞求美國向中國施壓！至於所謂「正告北京當局，務求要有克制」，就好似一個瘦骨仙，對住個世界重量級拳王講：喂！咪咁揚喎！依家客氣啲，避免我一陣手下不留情！阿哥，呢個畫面，諗吓都滑稽。

筆者其實係想起俄羅斯強人普京說的金句：沒有實力的憤怒毫無意義！

沒有實力的憤怒毫無意義

其實，普京仲有一句，更刺中小英此刻內心：真正的男人要不斷想辦法，而真正的女人要不斷掙扎！小英逗貓玩樂之餘，想必也有心懷「一廉幽夢」之時。

美國又的確有關注解放軍戰機繞台，指係「軍事挑釁」云云。中國外交部發言人華春瑩就話喇：台灣是中國的台灣，輪不到美國說三道四！

阿哥，字字鏗鏘，呢啲咪係底氣同埋氣勢囉！我戰機繞台又關你鬼事？好心管好你自己國內嘅疫情同低迷嘅經濟喇！自顧不暇，仲做乜鬼嫁樑喎！

其實，華春瑩的回覆，言簡意賅，筆者又想起普京嘅話：從某種意義上說，人需要鮮明地體現出一種品質——這就是寬容，依我看，寬容常常是具有決定意義的東西。

中國大國崛起，具備的就是寬容大度！習近平主席不是公開說過嘛：中國無論發展到甚麼程度，永遠不稱霸、不擴展、不謀求勢力範圍，不搞軍備競賽。

美國外交須跳出經驗思維

中國綜合國力提升，求的是為人類文明和進步事業作出卓越貢獻！反之，美國始終不改其做世界警察嘅形象，一味蝦蝦霸霸，咁多年來，尤其搞到中東生靈塗碳，雞犬不靈，至叻製造難民！

已故美國名學者、中日問題專家傅高義多次強調：美國應承認中國對世界嘅貢獻，公平對待中國。若然拜登政府不想重複冷戰歷史，咁佢嘅外交政策團隊，必須跳出「經驗思維」。美國唔好一面向中國示好，一面又聯合多國軍事係沖繩西南海域進行六國聯合訓練，盲嘅都知其動機係遏制中國！

不誠無物。筆者希望台灣嘅小英面對現實，唔好心存幻想，以為抱住山姆大叔毛茸茸嘅大腿，就可胡言妄語！好好搞好台灣經濟，讓人民豐衣足食，才是王道！要是一心想「出軌」搞甚麼「台獨」，筆者要正告佢：務必克制僥倖心理，否則就不單止解放軍戰機繞台灣西南空域了！勿謂言之不預也。

原圖：蔡英文Facebook

https://www.facebook.com/tsaiingwen/photos/10157720847251065

https://www.facebook.com/tsaiingwen/photos/10157718163896065