一連三日講左沖繩美麗海水族館，今日介紹沖繩另一個市外既景點－美國村。今次都係分三篇文章介紹，交通指南會喺第三篇講。又係睇左地圖先。 美國村由幾個大型既商場所組成既一個地方，（Ｐ字係停車場咁解，全部都係免費的。沖繩玩自駕的話係非常方便的。）右手邊軍病院前巴士站係你落車既地點，一行入去，有間超大既AeonMall，跟住旁邊就係著名既摩天輪，CarnivalPark，DragonPalace以及AmericanDepot。今日就去左AeonMall先啦。 落左車之後，向車尾方向行然後轉右，行１０分鐘左右就會到AeonMall。途中你會經過下面呢個地標Ａ。 咁就代表你行岩路架喇，繼續行既話眼前就係Aeon，旁邊就係大型停車場。 從上圖呢個角度睇，Aeon同摩天輪距離好近架咋。跟住行入去，地下除左係超市之外，當然仲有大量店鋪比你行啦。 呢度有VillageVanguard，ABCMart仲有已經殺到黎香港既Titi-Kaka。最後當然唔少得既美食廣場同埋遊樂場。 由於筆者去既時候係２月情人節。所以呢度有好多情人節禮物賣。   有美少女戰士仲有ＪＲ，跟住竟然有失戀朱古力？？可能你會問，點解去美國村都要行Aeon？出得黎寫梗係唔會點你啦，你估我唔驚比人起底咩？去呢間Aeon既原因係，呢間係免稅Aeon來的！！有追開文既讀者應該都會記得，幾星期前筆者介紹過小祿站既Aeon，但係市區既Aeon全部都唔係免稅店！因為只會係位於旅遊區既Aeon先會做免稅，所以如果大家想買藥品，化粧品之類既話，記住要黎呢間買。去小祿站買同樣既野買幾錢都好都係無得免稅的。 最後想講下既係，由於美國村已經係一個著名既旅遊區，所以你去到之後會發覺好多簡體字既熱烈歡迎語。好彩既係，呢度地方夠大，所以唔會好似香港咁比喼撞。 星期日既HKG報，會繼續帶大家行埋其餘幾個商場，買衫打機同食野。星期日見。 圖：由作者提供，地圖取材自谷歌地圖