每一位去過美麗海水族館既人都一定會同你講，去沖繩一定要去。因為呢度有全球第三大既水槽，單單睇上面呢張相就可以感受到呢個有四層樓高既水槽有幾咁誇張，海洋公園根本無得比。不過，每一位第一次去水族館既朋友都會有同一個煩惱，就係應該點搭車？需要預幾耐時間？附件既海洋博公園又近唔近？一日來回趕唔趕得切？ 筆者準備左９０張相，分三日為大家解答以上所有問題。首先睇下下面呢張地圖先。 從地圖中大家可以睇到一整個海洋博公園就係咁大的。而沖繩美麗海水族館只係佔成個公園既一小部份，而全個公園計，只係得海洋文化館、熱帶夢幻中心同埋呢個水族館係需要收入場費的，當中當然係水族館收費最貴，不過去得既一定唔會慳架喇，其餘既海洋文化館同埋熱帶夢幻中心就睇各位既興趣了，去埋就唔可能即日來回架喇。今日，筆者會先為大家介紹地圖左上方一大片既地方；星期二既刊登會全文介紹沖繩美麗海水族館既內部（想去既朋友不能錯過！）；下星期日就會講埋最右手邊既翡翠海灘以及最重要既交通指南！好喇，我地由正門入場喇。記得拎張免費地圖（有繁簡中文、英文同韓文）因為呢度好大架！ 一入到黎，最近正門既有呢間諮詢中心，中心既後面係記念品店。 水族館星期二先去，今日去睇海豚水上劇場睇表演先啦，都係免費架！ 每日有４－５場表演，入園時記得睇定表演時間。去到隨便搵位坐就可以，筆者去既當日係星期日，不過都唔係非常多人，要搵空位唔太難。 坐定定睇表演啦各位，睇完你會發覺香港既海豚原來係唔識表演的。 最後，筆者為各位準備左一條短短既片，片中有一個吊起左既波波，越吊越高，究竟條海豚能唔能夠頂到個波呢？留番大家去現場睇。 [embed]http://youtu.be/FxPU5zYD-kQ[/embed] 睇完海豚，去旁邊既海龜館同海牛館。 睇左咁耐，大家有冇一個問題，就係個公園大到咁緊要，咁咪有排行？對喇，所以其實呢個公園係有穿梭巴士搭的，單程１００日元，全日任搭２００日元，不過筆者去當日竟然係無料（免費！），幾大都坐下。 講明先，呢部咁細既車唔會快得過你行路好多，只係舒服啲而已。地圖入面有講班次同路線的，基本上都係順時針同逆時針兩個方向既路線，其餘有特別線係去海灘同熱帶夢幻中心呢兩個一頭一尾既地方。 多謝各位收睇，請繼續留意星期二既美麗海水族館同埋下星期日既交通指南呀！ 圖：由作者提供