好多人去沖繩都鍾意行AEON，原因係沖繩既AEON除左大家平時去開香港嗰種百貨公司連超級市場之外。仲係一個大型商場，好多衫褲鞋襪同精品既鋪頭都有。就好似筆者去親沖繩每晚返酒店前都會去既呢間AEON咁，入面有全沖繩最近市區既UNIQLO，仲有龍貓專門店同VillageVanguard，不知幾好行。今次唔駛睇地圖喇掛?搭單軌火車黎到小祿站就會見到下面呢座建築物，就係AEONMALL了。 一出閘，沿住天橋行過去就到，我地行左商場先，之後再行超市。 呢度樓高三層，地下(即日本叫1/F)係超市同埋FoodCourt，好多學生鍾意黎呢度食野的，地方夠晒大，可以一試。2/F係時裝層，UNIQLO同ABCMART等既牌子都集中喺呢一層，而3/F就係電器部。 下面係2/F既店鋪，真係乜都有架！ 因為兩首好出名既歌曲既關係，呢兩年，全日本都HIT就係呢隻妖怪。周街既鋪頭都總會播住佢首妖怪體操歌。今年五月，呢隻妖怪仲吹到黎香港添。未聽過既朋友可以去呢度聽下，了解下佢點解可以咁HIT。 [embed] 上面講過，呢間UNIQLO係全沖繩最近市區既一間，另一間最近既要去到樂市(即DUTYFREE旁邊，行10分鐘左右，日後會有介紹的)。不過好似今年內，GU會開到黎沖繩，當我知道既時候會為大家介紹架喇。唔知GU係乜?GU係UNIQLO既另一平價品牌，走青年人路線，一般香港人去大阪就一定會去心齋橋入面既GU掃貨架喇，一件T-shirt約20蚊港幣。好平呀！！ 行到攰就梗係要買野食啦，上一篇文章都講到，筆者每晚返酒店前一定會過黎搵食，原因係九點後，超市既魚生大平賣！！ 係咪正先?三文魚刺身￥999三盒，即係港幣$66，66蚊香港夠買一盒咋！！仲有其餘既刺身都有半價優惠。雖然呢間AEON收夜晚12點，但係如果想買平野，9點半前要黎，好快比人掃晒架！如果唔食生野，筆者去既時候係冬轉春，士多啤梨當造。 香港買日本士多啤梨，SOGO賣成200蚊一盒，呢度買三四百円(即係30蚊港紙)，可惜帶唔到黎香港咋，如果唔係運一箱過黎賣賺到笑！雖然呢篇文章出街既時候已經過晒季，不過為左比大家知道唔同產地既士多啤梨有咩分別，我為大家影左下面呢張相。 以我太太既味覺話比大家知，香川縣既最酸，最甜既係長崎或者宮崎。唔好食唔好打我呀。好喇，行完街又買完野食，可以去3/F夾公仔玩番陣。 玩完之後，跟指示牌就可以返出去小祿站。最後提提大家，自駕遊既朋友，呢度有免費泊車的，可以多加利用！ 下一集，我會帶大家去玩水，去沖繩最著名既美麗海水族館，究竟海洋博公園係咩黎?兩個地方一日內又去唔去得晒?聽講搭車好麻煩仲要兩個幾鐘先到?記得留意下一集既介紹喇！