今日帶大家去一間當地好出名既餐廳食串燒放題。呢間餐廳叫「串角」，喺沖繩有九間分店，其實佢除左串燒之外，仲有得飲啤酒同食壽司等日本食物。不過一心去到，當然串燒係主角，加上仲可以揀放題定散叫逐串比錢添，就更加會揀放題。(不過下次再去，我就會揀逐串比錢喇)睇左下面D相先再講啦。   今次介紹呢間鋪位於旭橋站附近，旭橋站旁邊就係那霸巴士總站。所以大家由美國村等等地方搭長途巴士返到出黎，食埋串角先返酒店係好順路的！！而營業時間係傍晚17:30至第二朝05:00，幾夜黎都唔怕！！ 痩せません(歡迎光臨) 店內既環境係咁的，我個卡位仲有電視睇添。好喇，入正題，睇餐牌。 上面呢個餐牌就係逐串叫既用的。不過由於我係食放題，咁當然選擇會少D啦。另外，點解有9間分店但係我介紹大家一定要黎呢間呢?因為係得呢間有中文餐牌，呵。 店主好有心機咁手寫左食物既中文解釋比大家睇。不過落單就一定要寫日文，好似上圖左手邊咁，寫番你個枱號，食物同埋要幾多串就可以。好喇，上菜好嗎? 呢度賣點係全炭火燒，如果你問我呢。可能我食慣香港串皇嗰D醃到好濃味既串燒，所以覺得呢間比較淡味，但係就換黎原汁原味既肉味同炭火味，睇你個人喜歡喇。 食完既竹串記得放番入呢個筒度。好喇，講左咁耐，究竟放題係幾錢位呢?答案係￥2500一個人，限時120分鐘，任食同任飲，飲品方面可以揀綠茶，汔水或者啤酒都得！比埋佢個官網大家睇，入面有齊價錢架喇。<<串角官方網站>> 最後提一次大家，除非你真係好叻日文，否則唔好自己賴醒走去第二間分店食。因為部份分店係唔招呼遊客的，就好似下面赤嶺站附近嗰間，我去左兩日佢都話FULL，但係明明大把位。我相信係鋪頭唔想逐樣解釋D食物係乜野黎掛。所以要去就去旭橋呢間啦。 好喇，飲飽食醉，下一集大家想去美國村定國際通? 圖：由作者提供，地圖取材自谷歌地圖