黃友坐監坐到唔捨得走？前民陣召集人陳皓桓踎足22個月後放監，佢噚日（18日）喺社交平台分享放監個零星期嘅感受。唔講唔知，原來佢踎得太耐，依家唔多適應「新生活」，暈車、肚痾、敏感症、人群恐懼症等等咩都出齊，辛苦到佢忍唔住講句「不如比（畀）我番（返）去監獄啦」！

陳皓桓帖文話，無論係生理定心理，佢都有好多後遺症。佢暈車暈得好勁，唔止頭暈同想嘔，仲要手腳抽筋，全身出冷汗，差啲要叫白車添！由於坐監期間食得好清淡，依家食番多啲油啲都肚痾，迫不得已推咗好多親朋好友嘅飯局。因為喺獄中早睡早起，即使現在有番高床暖枕，朝朝都係慣咗六點九就醒，精神自然唔多好啦。市區嘅空氣自然比大嶼山石壁監獄差，搞到佢依家有鼻敏感同氣管敏感，要食藥先得。

最慘嘅係，陳皓桓太耐冇見咁多人，搞到患埋人群恐懼症，見到街上人多車多，就會飆冷汗兼心跳加速，試過行出街十分鐘就忍唔住要返歸。呢啲症狀都幾嚴重，佢要成個禮拜先慢慢適應到。

陳皓桓已經離唔開監獄嘅生活？都係嘅，生活規律、飲食健康、空氣清新，除咗可以令人改掉陋習，仲可以令佢身體變好；街上空氣差、又嘈又多人又多車，難怪佢會掛住獄中生活啦！放心，如果有人忍唔住繼續搞事，總會有機會返去住嘅！

原圖：星島日報、陳皓桓facebook

https://std.stheadline.com/realtime/article/1308131

https://std.stheadline.com/realtime/article/1015744

https://www.facebook.com/figochanhw/posts/pfbid02yhZu33b18NtMtBNb8bwFCP9T2Wy9NmENh3pHHxqP3FSQcP4hjj5fJaBgvq91AdyUl