內娛再次大地震，繼范冰冰逃稅、鄭爽借肚但棄嬰等事後，近日內地最大嘅娛樂新聞（同時都係時事新聞），一定係「頂流（頂級流量、意指粉絲眾多的明星）」吳亦凡落網一事，日前有傳吳亦凡牽涉9宗罪，包括與未成年少女進行「多人運動」等，更有指吳被捕時崩潰爆喊，要求放生，並指自己是第一次。

吳亦凡由被爆玩耍感情，至今涉犯法被捕，中間牽涉嘅事件、人物太多，筆者不在此細說，筆者並非想批評吳亦凡有幾賤格，而係認為，內娛若想繼續發光發亮，必須整頓現時存有嘅「畸形」生態。

粉絲為明星癡狂

中國電影、劇集、綜藝，近幾年來有極大進步，成績超卓有目共睹。但現時內娛仍存在許多問題，包括：1）資本造星，即是以鋪天蓋地嘅營銷下打造出來的明星。2）逃稅風波，曾有傅逃稅風波演藝界人士多達550位。3）天價片酬，內娛身價驚人，當年范冰冰在《極速前進2》中嘅報價為人仔6000萬，有名氣嘅明星參加綜藝節目「閒閒哋」都片酬過億。4）潛規則，導演「潛」演員，大明星「潛」小明星，網上傳聞一大堆。5）飯圈文化，資本打造、炒作嘅流量明星愈來愈多，有粉絲圈因而變得畸形，為明星癡狂，做出令人意想不到嘅事，當中私生粉的行為更是令人人喊打。

其實內地曾多次出手整頓內娛「畸形」生態，包括封殺問題藝人、實施「限薪令」，但力度似乎仍未夠之餘，而且好多時，係等到有爆料出嚟先出手。

法律面前沒有頂流！明星一旦違法，必須快速出手封殺，一封到底，更應徹查一網打盡，法制咖絕不能留（意指明星沒特權，無論名氣多大，犯事一視同仁）。

現時內地全平台封禁吳亦凡帳號，對於封殺劣跡藝人，梗係要支持啦！

原圖：網圖