秉承住「好事不出門，壞事傳千里」嘅千古名句之下，喺移民呢方面，唔係聽到啲人離開香港有幾好，而係成日聽到佢哋移咗民後有幾慘。近日，移民又有笑料啦，話說，有對香港夫婦早前移民到英國，太太因為冇晒啲「麻雀腳」，令到佢好後悔移民。

早前有位港人喺Facebook群組「英國香港人生活交流區」發文，大呻唔少移英嘅港人喺當地被人欺負，又話好掛住香港乜乜乜，更稱認識一對夫婦，指太太嘅英文能力只有小學程度，加上難搵「麻雀腳」，令嗰位太太好後悔移民英國，甚至因為咁而同丈夫冷戰，嗰位太太仲好霸氣咁話「唔返香港就離婚」。

麻雀係中國文化，正宗國粹，由古至今仍極受大家歡迎，係大眾嘅娛樂之一，同時係香港人最愛嘅消遣活動，有啲人隔一段時間冇牌打，仲會出現「手痕」現象！筆者雖然唔係「麻雀友」，但偶爾都會打打牌娛樂一吓，身邊亦好多極熱愛打牌嘅朋友，經常聽佢哋講話好想打牌，冇牌打人生冇樂趣，手好痕云云，深知麻雀的確令人「上癮」，亦明白移英呢位太太冇得打牌的確係幾慘！

丈夫最終有何決定，選擇「自由」定選擇婚姻，真係唔知！但筆者想講，移民前真係要諗得清清楚楚，如果唔係，又搞出啲咩笑話就唔好啦！

原圖：星島日報

https://www.singtao.ca/3859779/2019-10-22/post-%e9%ba%bb%e5%b0%87%e9%a4%a8%e7%a6%81%e4%bb%a4%e4%b8%80%e5%88%80%e5%88%87-%e6%b1%9f%e8%a5%bf%e7%b8%a3%e8%ad%a6%e6%80%a5%e3%80%8c%e7%b3%be%e6%ad%a3%e3%80%8d/