【HKG訊】前「香港人優先」成員招顯聰前日高調宣布成立「香港歸英獨立聯盟」(英獨聯)，身兼發言人嘅佢仲巧威威咁事先張揚，話若能進身立法會，將會「發假誓」。誰知一日唔夠，英獨聯已經連番甩轆，首先係收捐失敗，之後招顯聰本人仲「閃電退聯」。無論佢有乜目的，「政壇笑匠」之類嘅名銜睇怕要跟足佢一世喇！

公司名義開戶收捐款甩轆

招顯聰以建築公司「巷蜀」(暗喻「港獨」)嘅名義，喺東亞銀行開戶口收捐款。點知尋日上晝，有網民存款入呢個戶口被拒，惹來東亞銀行政治審查戶口嘅嫌疑。之不過，招顯聰向銀行查詢後，銀行回應話存款入新戶口，必須出示相關生意往來證明。問題係，呢個戶口本身就係掛羊頭賣狗肉，邊有證明啫？本來想偷龍轉鳳，家陣此路不通，他唯有死死地氣向網民道歉。 更加滑稽嘅係，英獨聯上晝收捐款失敗，下午仲鬧出「閃電分手」嘅笑話。招顯聰發表聲明，話自己同英獨聯以君主立憲抑或共和國方式「獨立」嘅看法有分歧，加上英獨聯唔想同台獨拉上關係，自己只能夠「即日同佢和平分手」。

記招上演內訌爆粗吵大鑊

講真呀，早喺英獨聯成立嘅記者招待會上，佢哋已經論論盡盡。招顯聰除咗遲到，又唔提黨內有乜成員，中間仲因為搵唔到支旗而同黨友爆粗吵大鑊。家陣招顯聰同英獨聯「閃電分手」，劇情峰迴路轉，絕對令一眾花生友笑到碌地。 原圖： http://m.creaders.net/china/2016/06/27/1690876.html

投票已截止，多謝支持