今集係海女篇嘅最後一集，亦係交通指南。久慈話晒都係北三陸地區，由東京出發計當然要搭新幹線，而搭得新幹線就一定要買PASS，所以今集嘅內容主要介紹兩種不同嘅JR PASS，不同嘅PASS係有指定可以乘搭嘅車，所以大家要留心自己買嘅係邊種PASS黎去決定以下邊一種交通方法。首先又睇下地圖先。
從上圖可以睇到，久慈位於日本島嘅最右上角咁滯，由東京出發，要搭東北新幹線去二戶或者八戶轉車。詳請如下：
提提大家，2016年4月1日前以上呢種周遊券叫做JR東日本通票。用法大致一樣，都係可以由售票日起計，14天內任揀5日使用，任搭JR東日本旗下嘅任何火車線（包括埋機場嘅N’EX線同新幹線架！），呢5日不需要係連續用，即係你打散隔幾日用都得。唯一嘅分別就係加左價，仲要可以去嘅地方少左。不過呢篇文章出街嘅時候已經無左JR東日本通票所以唔再講喇。
講番JR東日本鐵路周遊券（東北地區）呢張，大家可以用佢黎搭東北新幹線，去八戶站，車程約2小時54分。然後再從八戶站搭JR八戶線直達久慈，車程約1小時43分。
大家早前有留意新聞都知，依傢東北新幹線可以直達北海道了。
到達八戶，搵八戶線月台。不過搭鐵路咁普通點對得住讀者？今次我揀左全日得一班車的觀光列車Resort Umineko班次嘅車坐，有咩咁特別？睇相啦。
呢部車嘅第一卡車箱（即係上圖）係指定席來的，不過唔駛加錢，只要你預早預約就可以（好似搭新幹線咁去JR服務中心就可以）。特別之處就係單排嘅坐椅可以擰黎擰去，方便大家望海！好正架！一齊睇下相啦。
第二個前往久慈嘅方法就係使用JR日本鐵路通票。呢張通票同東日本嗰張最大嘅分別，就係呢張PASS可以通行全個日本，如下圖：
大家成日都好想問點樣來回大阪／名古屋同東京，都係靠呢張PASS。去得全日本當然唔會平，7天連續任搭的話成人收費係￥29,110。記住，係連續7日，中間唔可以斷，唔搭就你自己蝕底。不過咁，呢張PASS除左可以搭JR火車之外，仲可以搭JR巴士，所以就有以下前往久慈嘅方法，就係由東京出發，搭東北新幹線到二戶，車程約2小時42分，轉JR巴士直達久慈，車程約一小時。
二戶站到著！
記住係東口出，西口個巴士站係地區線來的，東口呢個先係去久慈嘅長途巴士站。順帶一提，上圖已經貼左巴士嘅時間表比大家睇，不過你唔駛睇都得，因為巴士開出時間係夾正東北新幹線到站時間的，你落左車之後大約有10分鐘時間轉巴士，反而亦然，巴士到達二戶站嘅時間，亦係大約有10分鐘時間比你轉東北新幹線出東京。呢個當地人出入市區嘅方法黎架！
巴士到，寫到明係前往久慈駅的。上車訓一覺啦。
到站，無PASS的話，單程車費係￥1,540。所以如果想慳錢嘅話，就買東日本鐵路周遊券（東北地區）喇。另外，如果有人／網頁教你搭去盛岡轉巴士去久慈的話，呢個係搜尋引擎得出黎嘅結果，你叫佢自己試一次先講啦。
最後，我想借呢個機會多謝久慈觀光公社嘅Yuki小姐。今次嘅旅程可以咁順利全靠佢提供嘅資訊。大家都明白久慈呢啲無乜香港人去嘅地方，莫講話旅遊書，甚至連一個中文網站都無。於是我就電郵過去觀光公社希望了解下交通同酒店。結果佢空郵左一大份當地嘅旅遊資料過黎比我，仲送埋海女劇集嘅明信片添。淨係空郵都要成百蚊港紙，都仲未計佢心意，佢仲驚我睇唔明日文，搵張紙仔用英文解釋番比我聽。講明先，我無同佢講話我係寫旅遊BLOG架，完全係用一個遊客嘅身分去問。所以我非常感謝Yuki小姐。亦希望大家多多支持久慈市。
下星期我會介紹另一個新興嘅日本旅遊點，就係三島吊橋Skywalk帶大家睇富士山。下星期見。
圖：由作者提供，JR地圖取材自東日本旅客鐵路網頁及JR日本鐵路通票網頁。
JR東日本鐵路周遊券（東北地區）：http://www.jreast.co.jp/tc/eastpass_t/index.html
JR日本鐵路通票：http://www.japanrailpass.net/zh/index.html
投票已截止，多謝支持
返回
