上回簡介左海洋博公園，仲帶大家睇左海豚表演。今日戲玉當然係沖繩美麗海水族館吧。 當大家去到上圖呢條扶手梯時，個指示係叫你落左去之後先轉右。 睇下個海兩隻色架，幾靚。跟住轉右，水族館入口就喺你後面。 跟住麻煩各位去售票機買飛，入場費係￥１８５０。四點後入場會平少少，不過如果你不是自駕的話，無可能四點後黎到的。算罷。 好似搭地鐵咁入閘，張飛會比番你留念的。一入去第一個景點就係摸海星。 同香港最大既分別係，呢度好大方咁任你摸，地方又大，海星又多。去過香港摸海星既朋友，唔好提喇。無得比的。之後會去到珊瑚之海同埋熱帶魚之海。呢度係好多個大大小小既魚缸比大家睇魚的。睇相易明啲。 睇唔睇到上面隻蟹？呢隻叫沖繩蟹，手指咁細隻咋，仲要得一隻鉗。之後我地會去到黑潮之海，睇下呢個四層樓高既水槽有幾吸引。 係咪好大呢？呢度仲有足夠既地方比你影相，最高既一層仲有戲院式既坐位比你坐低慢慢睇魚。上圖可以見到，每層都有地方比你影相，又唔會遮住樓上樓下。不知幾細心。講左咁耐，我諗大家都肚餓架喇。不如坐低對住個黑潮之海食野？放心啦，好平的，你估香港咩？ 全個海洋博公園，最值得食野既就係呢個地方，可以對住個海黎食之餘仲要唔貴，上圖係兩個午餐，每個都唔駛一百蚊港幣。呢間野係快餐店形式運作的，自己搵位。不過讀者咁聰明，識得揀時間黎食，完全唔難搵位的，當日仲要係星期日添。食飽之後，再去就係鯊魚館。 睇完鯊魚唔好咁快走住，臨到出口會見到一部升降機，係用黎上去黑潮之海既海面的，睇埋先走吧。 呢度可以居高臨下咁望住個大水嘈，仲有塊玻璃比你從上而下咁望落去添。筆者順手對住外面個大海影左張相。張中就係海龜館了，上回講左今日唔重覆了。離場既時候，當然又會經過一間紀念品店。 出口既旁邊有一個海洋生物標本館，免費入場的，反正就喺隔離，入埋去睇下吧。 連汽水機都見到海女＠＠(能年令奈)。 水族館篇就介紹到呢度為止。如果大家黎呢度只係想參觀呢個水族館，再睇埋上一集介紹過既海豚表演的話，即日來回係無問題的。但係如果你想睇埋熱帶植物園以及沖繩鄉土村的話，咁就一定要兩日一夜了。 開放時間上面有相大家可以睇到。整個海洋博公園連水族館年中無休。只係每年１２月第一個星期三及星期四因為保養關係會休館，這是必須要留意的。提提大家，星期日既ＨＫＧ報會刊登埋交通指南的。想去沖繩美麗海水族館既朋友，星期日記得留意ＨＫＧ報。有行程上既問題的話，歡迎到facebook留言。好睇既話，請你ＬＩＫＥ以及ＳＨＡＲＥ比你既朋友。多謝支持，星期日見。 圖：由作者提供