今日為大家介紹既呢個地方，我敢話無一本香港旅遊書有介紹過，亦都極少香港人識。大家都知筆者最鍾意就係夾公仔，於是就周圍搵夾公仔鋪頭，終於比我發掘到呢個好地方，就係位於赤嶺站附近，仲要係24小時營業既マンガ倉庫(漫畫倉庫)。 唔好聽個名就以為得漫畫，其實呢間仲係2手衫店，CD，樂器，GAME，夾公仔，玩具，乜都有既鋪頭，一齊入黎睇下啦。 二手名牌手錶，手飾。 衫，電器，同樂器一應俱全，問你怕未。另外如果你鍾意玩咭GAME既話，呢度有個CORNER係賣咭的。應該有齊你玩開既咭架喇，仲可以逐張買添。(不過人地望住我唔敢影相=。=”)不過最奇既係，呢度夾公仔機反而唔係好多部，大約20部左右啦。但係唔夾都無所謂，因為呢度有得買景品！！！ 如果像素夠既話，大家應該會睇到上面D景品既價錢架喇，係咪平到笑呢?因為呢度既景品多數都係D人夾公仔之後唔拎走，放起度賣的。所以價錢比出面買全新既平好多！！！雖然叫二手，但係根本未開過盒。入番幾盒返香港賣都仲得。今次無介紹錯喇掛?而我太太就叻喇，搵到AKB48日本隊波衫一件，仲要係大島優子既添。幾錢就唔講喇。哈哈哈。

交通指南:

由赤嶺站行過黎只需5分鐘(沿下圖紫色線行就係，一轉彎基本上已經望到)。而赤嶺同那霸機場只係一站之隔。所以CHECKIN完仲有時間剩既先過黎慢慢睇都未遲。如果你係自駕既話，呢間店除左24小時營業之外，仲有免費車位提供。夜晚訓唔著過黎夾下公仔，再去酒店附近既24小時麥當勞食個薯條不知幾爽！ 今日帶大家買完野，星期二刊登既HKG報，我會帶大家去食地道炭燒既串燒放題，唔好錯過喇！！ 圖：由作者提供，地圖取材自谷歌地圖

投票已截止，多謝支持