今日筆者帶大家黎遊愛河。愛河係高雄既其中一個景點，愛河既兩旁都係文化藝術既東西，包括有高雄市立圖書館、高雄市立歷史博物館、高雄市電影圖書館、星座碼頭同埋真愛碼頭。而想遊愛河既話，當然要搭船啦，條船叫愛之船。其實就好似外國遊客黎香港要搭天星小輪，香港人去大阪道頓堀要搭觀光船一樣。黎得高雄，唔好錯過。

愛河船既船票直接喺碼頭就有得賣，每15分鐘左右就有一班船。但係遇上旅行團既話就要等耐少少，不過如果你兩個人去既話，多數都會比你攝上船先。票價係成人NT$120，船程約25分鐘。船上面有導遊沿河講解愛河兩邊既景點同歷史，最佳既遊船時間係傍晚，因為無咁黑，但又無咁熱。由於船隻係太陽能船，所以係無冷氣架！不過放心，夜晚佢都識行架，因為佢係白天充定晚上要用既電的。尾班船係晚上十點。

以下係我喺船上影既相，所以會比較搖。請見諒：

同場加映，水陸兩用船！（當地人叫佢做鴨寶寶）

呢隻船又係高雄另一個好玩既遊戲，呢隻水陸兩用船係先喺高雄市遊車河，跟住再落水遊愛河。全程大約40分鐘，票價就貴啲，要NT$300一位（聽聞依傢做緊推廣，每位只需NT$150！麻煩快將出發既網友去到高雄時求證下）。

愛河登船既位置位於國賓大飯店既旁邊。（筆者每次去高雄都係住國賓的，雖然貴一貴，但係真係靚、望海同埋方便）熟路既朋友可以搭168公車直達國賓大飯店站，一落車就會見到愛之船個售票處。搭捷運既朋友就辛苦少少，無論市議會站定中央公園站都要行１０分鐘左右。不過上次教過大家免費租單車，大家不妨喺捷運站租部單車踩過黎，國賓大飯店門口有單車點可以還車的。

下星期日，我地繼續向南部出發，下次會帶大家去另一個商圈，行SOGO同全高雄最大既誠品。

圖：由作者提供，地圖取材谷歌地圖

 

投票已截止，多謝支持