今年初開始，幾間中台既航空公司排住隊減價。基本上除左暑假期間之外，大部份時間都係一千蚊一張來回機票仲要包埋稅咁滯。真係抵過去澳門，所以沖繩篇完左之後，筆者帶大家去台灣行下。

說實話，台灣黎講，筆者比較喜歡中南部。台北人多車多，樓又高，捷運又多人。所以如果大家喜歡高雄篇的話，筆者會由南向北寫上去。

好喇，講番高雄，其實高雄地方唔算好大，至少細過香港，所以好多景點都可以搭公車或捷運就可以去到。另外，高雄仲係去墾丁既轉車站，大家如果想去墾丁嘆陽光與海灘既話，就要由香港搭飛機去高雄小港機場，轉兩個半鐘頭車去墾丁喇。放心，我會詳細為大家介紹墾丁的。今日我地一齊睇下高雄捷運地圖先：

高雄捷運得紅色同橙色兩條路線，而大部份既市區景點都係集中喺紅線咁滯。橙線我諗大家只會用西子灣同鹽埕埔站。依傢我地由上至下，由左至右咁為大家介紹下高雄市。

義大世界機動遊戲刺激過香港

R16左營 - 可接駁高鐵。另外亦可轉乘公車到義大世界，義大世界係一個好似香港迪士尼咁上下既主題公園，入面有酒店，有個大商場，當然唔少得一個機動遊樂場啦。呢度有比香港更刺激既機動遊戲，下次詳細介紹時再話你知啦。另外，呢度每年都會搞一次大型既音樂會，詳情就自己留意各FANS網站了。

R14巨蛋 -  呢度有漢神巨蛋商場，商場內有著名既商店，包括TAILUNG HANDS！另外夜晚仲可以去高雄必到既瑞豐夜市。

高雄必到瑞豐夜市

R11高雄 - 可接駁台鐵，另外亦可步行前往長明街商圈。

R10 / O5美麗島 - 呢度係全球十大最美既地鐵站之一，去呢度唯一想做既就係影個彩色玻璃做既天幕，好多新人都喺呢度影相架。另外，夜晚仲可以去高雄另一個必到既夜市 - 六合夜市。

R9中央公園 - 呢度除左有夜晚好多人黎既城市光廊，仲有女士們最愛去既新堀江商圈，新堀江商圈有高雄女人街之稱，喺呢度女士們可以大買特買！！

R8三多商圈 - 其實呢度唔係商圈，應該叫商場先岩。呢度有全高雄最高既建築物 - 85大廈，有SOGO，仲有高雄大遠百！！高雄大遠百係一個座大型商場，而全高雄最大間既誠品書店就係喺大遠百購物中心既17樓。另外，呢度仲有IMAX戲院添。

大遠百有IMAX戲院

R6 凱旋 - 呢度有免費穿梭巴士載你去全高雄最大既購物商場 - 統一夢時代購物中心！呢度除左有誠品、DAISO之外，夢時代頂樓仲有個南台灣第一座摩天輪《高雄之眼》。

O1西子灣 - 呢度可以步行去中山大學，十八王公廟同打狗英國領事館呢啲景點之外，仲可以步行去鼓山渡輪站，搭船去旗津玩！！旗津有咩玩？有博物館，又有著名既斗六冰室，同埋海味市場。

以上大部份加黑字體既景點，都會在日後既文章中詳細介紹，希望大家喜歡高雄篇。記得逢星期日留意HKG報既刊登。下星期日見。

圖：由作者提供，高雄捷運路線圖轉載自高雄捷運網站

 

投票已截止，多謝支持