話說，幾年前，美國頁岩油開發成功。現在，美國從能源進口國，變成能源出口國。各石油國家頓失市場，唔係內亂，就係要搞改革。(前文：https://hkgpao.com/articles/100184)

OPEC開會救市？

面對油價大跌，各石油國家都想油價升翻上去。2017年初，OPEC開會決定齊齊減產，希望減少供應，刺激油價。 最大鑊係沙特阿拉伯。數據顯示，一年來，沙特已減少生產石油每日100萬桶。其中，沙特石油出口去美國的數字，今年1月至今，已跌了34%，跌到今年7月約每日52萬桶。數字係7年新低。 不過，半年過去，油價從58美元降至44美元一桶。原因？一來，非洲窮兄弟增產。二來，美國睬你都傻，你有你減產，我有我增產，互相抵消。 今個星期OPEC在俄羅斯開會。會上結果：繼續減產！非洲國家尼日利亞和利比亞，要切實跟從OPEC決定，齊齊減產。 但部分石油國家對減產有保留，例如厄瓜多爾和伊拉克，都話頂唔順，想增產報國。能否維持OPED決議，有待觀察。

美國要出口！

正當OPEC開會救市，美國不單令OPEC少了美國市場，更要參與國際石油出口市場，與OPEC競爭！ 美國現在每日生產700多萬桶石油。除了能夠滿足國內超過60%的需求，美國還想出口，賺取外匯。 特朗普上台後，中國成為美國石油的最大買家。2017年至今，中國每日向美國進口10萬桶石油，比去年同期增加超過10倍。難怪特朗普從選舉時大罵中國，變成大讚中國。 但美國還想擴大石油出口市場。首先要打擊競爭對手：俄羅斯！

借「通俄門」制裁俄國

特朗普的「通俄門」已經在美國炒了一年多。特朗普再三否認選舉期間獲得俄羅斯的支持。 筆者就曾講過，「通俄門」好可能係假。但如果係真，選舉制度如此脆弱，即香港泛民搞「真普選」，係想香港被外國干預。 現在，美國國會利用「通俄門」事件，以419比3票，通過對俄羅斯制裁。制裁名單主要係俄羅斯的能源公司和金融公司。罪名係：俄羅斯干預美國大選！ 在國會佔大多數議席的共和黨，唔理罪名係乜，聯同民主黨，齊齊支持通過制裁議案！ 點解？除了美國的冷戰思維「好憎俄羅斯」之外，還有一點：共和黨同石油公司的關係密切。制裁的對象，正係俄羅斯能源公司！ 制裁議案還加上一條條款：總統特朗普不能擅自撤銷！撤銷要先得國會同意！ 雖然特朗普同普京(好似)好friend，但美國外交有一種特性：總統點吹都好，都要過國會一關。特朗普大可以話：制裁俄羅斯，係國會的事情，唔係我的問題，愛莫能助！ 估計普京心裡大罵…

歐盟先拍枱

不過，制裁俄羅斯，普京尚未出聲，第一個即時拍枱反對的，竟然是歐盟！ 原來，歐盟正與俄羅斯商討興建波羅的海海底油管。現在俄羅斯供應歐盟的天然氣管道，主要途徑烏克蘭和土耳其。烏克蘭同俄羅斯關係勁差，而歐盟同土耳其關係又唔好。當地政局一有不穩，歐盟隨時「斷氣」。為確保「條氣順」，歐盟正計劃在波羅的海增設管道。 美國制裁俄羅斯的計劃中，集中火力制裁能源公司，尤其係阻止俄羅斯油管建設！ 如果美國執行制裁方案，負責波羅的海油管建設融資的歐盟金融機構，將面臨美國的大額罰款。金融機構會不會為歐盟安全得罪美國？德銀前車可鑑！ 所以，歐盟主席立即拍枱，站起來，笑著勸：請美國三思……

美國舞劍 志在出口

歐盟面對美國制裁俄羅斯，威脅其能源安全。美國背後的潛台詞係：歐盟，你想買俄羅斯天然氣，無咁易！美國大佬手上有石油貨，你識做啦！ 美國以「通俄門」為藉口，一招制裁打擊俄羅斯能源出口，順勢打埋歐盟，逼歐盟買美國石油，總統特朗普仲可以置身事外，果然非常高招！ 在制裁決議後，俄羅斯外長已經立即飛去美國華盛頓，與國務卿蒂勒臣會面，商討對俄制裁問題。 筆者估計，7月14日，法國總統馬克隆宣稱自己可用「個人魅力」，遊說特朗普重返「巴黎氣候協議」，當中最大的問題就係：歐盟要向美國買幾多石油先？ 只要歐盟肯買美國石油，萬事有商量！但美國不會給歐盟太多時間，歐盟，快做決斷啦！

截稿前最新消息……

特朗普扮無辜的行動，剛剛被兩名俄羅斯惡搞節目主持人識破！主持人扮烏克蘭總理，成功與美國能源部長打電話22分鐘！電話上，美國能源部長表明，特朗普政府不滿歐盟的波羅的海油管，準備支持美國國會的制裁行動。 不知特朗普點收科？ 原圖：文匯報、澎湃新聞、網絡素材 http://paper.wenweipo.com/2016/03/16/YO1603160017.htm http://www.thepaper.cn/newsDetail_forward_1413027 http://588ku.com/sucai/2560764.html

投票已截止，多謝支持