「o靚仔，你邊度嘅？」 「我係XX嘅！」 上述對白，相信大家睇戲時，必曾目及耳聽。本以為純屬虛構的情節，原來如有雷同，其實唔難。 今日，香港記者協會舉辦座談會，邀請三名特首候選人「吹水」。主人家是記協，話題自然離不開新聞自由、傳媒採訪，記協主席兼主持岑倚蘭「吹水」之外，少不免「吐吐苦水」，借機提提香港新聞自由日差。

約章重提網媒採訪

談新聞，無問題；吐苦水，亦合理，不過要人簽署新聞自由約章，就似乎有點那個。所謂猛虎不及地頭蟲，自家主場，豈有外人不屈服之理？不過這也是小事，魔鬼永遠在細節，約章其中一條要候選人「承諾開放給網上專業媒體，採訪政府記者會及活動」。 咦，似曾相識喎！如果大家善忘，就由本俠溫馨提示大家，日前記協曾向特首發出公開信，呼籲於特首選舉日，「要求政府在選舉當日作出特別安排，容許持有本會正式會員證件的網媒記者，參與所有由政府安排之新聞活動。」

不入會並非網媒？

嘩！岑大人，真係好大嘅官威，做網媒原來先要經記協審批，未入會你甚麼都不是，於這個「人人是記者」的年代，可謂莫大的諷刺。再看看約章，「網上專業媒體」又是何故？執筆至此，相信讀者們已經一清二楚，所謂「專業媒體」，又怎會與記協不無關係？ 往後，網媒欲採訪政府活動，再不用出刀槍劍戟斧鉞鉤叉鞭鐧錘抓鏜棍槊棒拐流星，只要拋出一張記協證，包你通行無阻，萬事皆順。 「先生，你邊間媒體？」 「我係記協嘅。」 想意氣風發重演上述對白？前提是你要先交會費。 圖︰有線新聞截圖

投票已截止，多謝支持