上集講左Duty Free，筆者相信大家都識去掃貨架喇。今日繼續由おもろまち駅出發，去當地人都好鍾意去既商場Naha Main Place同埋佢旁邊既樂市。我地睇下地圖先： 同上集一樣，搭單軌去おもろまち站出，穿過左Duty Free之後，先會見到下圖呢間TSUTAYA書局，有興趣既可以入去睇下，幾大的。再行前幾步，就會見到Naha Main Place商場。 Naha Main  Place Naha Main Place係一個好典型既日系商場，基本上同大阪阿倍野既Q’s Mall一樣咁滯。地下有大型超市、電器鋪，二樓有機鋪同戲院，其餘衣服、食肆、精品店樣樣有，我地一齊入去睇下啦。   AKB彈珠機呀！好抵玩，每局￥１００咋！筆者就係喺呢度打住機等我老婆行街的。講番呢個商場，除左一啲耳熟能詳既時裝店例Lowry’s Farm之外，其餘既店鋪都係賣一啲較為平價既ＪＰ時裝（筆者唔識形容，將香港人叫既ＭＫ暫時叫做ＪＰ吧），一件衫或者一條裙都係一百蚊港幣左右，所以好多當地人都黎呢個商場度行街的。行完之後，經過博物館／美術館之後，就會去到另一個建築物，就係CO-OP（蘋果商場）。 CO-OP (蘋果商場) 蘋果商場地下係一家超市，二樓全是食肆，當中最特別只有呢一間玩具反斗城，因為佢係全沖繩唯一一間。大家無興趣既話，再行多幾步，就會去到RAKUICHI樂市，筆者行完呢幾個商場之後，天都黑齊了。 RAKUICHI樂市  如果要我形容樂市既話，我會話呢度其實係一個超大型停車場。而停車場既旁邊唔係油站，反而係大家上圖見到既幾間大型店鋪。當中有之前小祿ＡＥＯＮ篇講過既UNIQLO、無印良品、OUTLET篇見過既Sports DEPO同埋有得免稅既DAISO。 自駕遊既朋友，今集所講既幾個商場都有免費停車位的，請盡請享用。自遊行既朋友，搭單軌落車之後，原路行亦要原路走。 下集開始，我地又會番返去國際通，行街買手信之餘，仲要帶大家食石坦牛同黑蒜麵。多謝支持！ 圖：由作者提供，地圖取材自谷歌地圖