話說兩位前黃色區議員朱江瑋、趙柱幫，被銀行註銷戶口。難得重拾昔日「光輝」，見報做新聞人物，又可以借自己對佢哋口中所謂嘅「美麗新香港」罵東鬧西，理應興奮嘅佢哋，竟然係提唔起勁。

朱江瑋受訪嘅時候，用「好沮喪，慘過冇passport」嚟做形容；趙柱幫就嬲嬲豬上身，覺得係「會對生活造成一啲不便，不過最離譜就係唔交代原因」。

噢，呢一刻先知原來「鐵打」嘅黃友，都係要生活嘅。

諗番起2019年黑暴，黃黑掛喺口邊嘅金句係「攬炒」，即係為咗要拖冧政府，不惜「同歸於盡」。誰不知真係發生喺自己身上嘅時候，舊時嘅慷慨「講經」，原來真係經唔起半點考驗。

講就兇，做就虧。乜兩位「已完」都覺得「生活不便」係一個問題，咁畀美國制裁嘅香港官員，對於佢哋嘅「生活不便」，兩位又點睇？再退一步，當年畀黑暴影響日常、「生活不便」嘅市民，兩位又關心過？

自己大事 他人小事？

抑或自己嘅生活就係驚天大事；其他人嘅就可以放埋一邊？

唔單止兩位過氣政客，黃歌手何韻詩都有類似抱怨，話自己book唔到場開騷，所以香港就係「不正常」。

望住呢班人，真心覺得有趣。

2019年為咗政治，唔講生活，不提正常。今日難得「夢想成真」，攬炒踏出咗半步——「自炒」先，點不知竟然係有怨言。佢哋嘅潛台詞係咪即係要港府或者其他人「炒」咗先，先可以「炒」佢哋？

真係從來都冇諗過，原來「攬炒」都要講先後、談次序。好啦，咁而家「自炒」咗，次序唔啱，咁仲攬唔攬炒？三位黃人嘅答案，當然就係︰不了。而且佢哋仲幫呢種先後倒轉嘅「攬炒」正名——呻做係「打壓」。

所以話黃黑邏輯，從來都係常人難以理解。一門「攬炒」都可以咁鬼哲學，咁多曲折，或者大學都可以開一門學科研究吓。

前題係呢一班黃黑要自動獻身，畀人研究。

原圖︰星島日報
https://std.stheadline.com/realtime/article/1958600/即時-港聞-前區議員趙柱幫朱江瑋楊彧辭任後投身保險界-涉虛報入職前入息

https://std.stheadline.com/realtime/article/1958500/即時-港聞-朱江瑋被捕-扣留調查兩日後准保釋-下月向警方報到

https://std.stheadline.com/realtime/article/461098/即時-娛樂-緋聞女友陪返加拿大寫書-何韻詩憶兒時暗戀對象

https://std.stheadline.com/daily/article/2075051/日報-港聞-黑衣人調整暴力破壞策略