國家主席習近平曾經指出，當今世界，百年變局和世紀疫情交易，帶來很多全球性挑戰，需要全球性合作。中歐在謀和平、求發展、促合作方面有很多共同語言。我們要拿出擔當，為動蕩變化的世界注入更多穩定性和確定性。

之不過，政客就未必如此諗，有啲就係要吹縐一池春水，乘機抽水，凸顯自己係「風雲人物」甚至係「蓋世英雄」！呢，俄烏戰事自今年2月24日至今，雙方交戰至今已近10個月，戰事依然膠着。眾所週知，烏克蘭之所以頂得住俄羅斯猛烈攻擊，關鍵係美國及歐盟西方諸國源源不絕提供嘅武器、金錢和情報。

英國首相辛偉誠不久前出席係拉脫維亞首都里加舉行嘅第3次「遠征軍聯合部隊」（JEF)峰會，仲呼籲盟友增加對烏克蘭嘅武器供應，加強其防空系統，降低俄羅斯嘅重整軍備和補給能力。英國自己內外交困，國內罷工、通貨膨脹、能源短缺等問題困擾，作為首相唔去解決自己嘅經濟民生，倒愛做「架樑」叫盟友軍援挺烏，再咁瞎搞下去，睇怕好快步前首相卓慧思下台命運！

嗱！烏克蘭總統澤連斯基早前又旋風式訪美，得到拜登及第一夫人吉爾親自迎接，並到國會山莊向參眾兩院議員發表演說，果然有「風雲人物」嘅架勢！有「戲子總統」之稱嘅佢，盡管七情上面，誓言不會投降，並預告俄烏戰事明年將迎來轉捩點！

好嘞！吹完水終究要露出「丐幫幫主」嘅真面目，澤連斯基話題一轉，人窮國貧卻志氣可嘉：我們有火炮，是的，謝謝你。這是否足夠？坦白說，不是。為了確保巴赫木特不只是阻止俄羅斯軍隊的要塞，但同時令俄羅斯軍隊完全撤走，需要更多大炮及炮彈⋯⋯財務援助亦同樣重要，你們的金援並非施捨，而是對全球安全及民主的投資，我們以最負責任的方式運用。果然有縱橫家嘅模樣！

講來講去，就係伸手要錢要軍援！

呢招掂喎！美媒不久前報道，美國正考慮向烏克蘭提供愛國者導彈防禦系統和450億美元援助，一面泵水一面強化烏克蘭防空能力。愛國者導彈防禦系統可說是美國最先進嘅防空工具之一，對烏軍嘅攔截俄軍導彈能力肯定進一步增加，令烏軍有喘息機會，咁搞落去，俄烏戰事睇怕仲有排玩！

世上本無事，政客自擾之！佢哋就係完全冇考慮習近平嘅呼籲：拿出擔當，為動蕩變化的世界注入更多穩定性和確定性！更可笑嘅係美國，一味喊「中國威脅」，一邊又好做架樑，為世界和平添煩加亂！美國佬，嚴格而言，係患上思覺失調！