正所謂「新官上任三把火」，喺英國，要想畀國民新鮮感，最簡單直接就係推翻上一任嘅政策方針，即係推翻卓慧思搞到滿城風雨嘅減稅政策！同英國首相辛偉誠傾掂數嘅財相侯俊偉，喺上月17日推出咗規模550億英鎊嘅新加稅和削減開支方案，填補英國國庫大概600億英鎊嘅大氹。喺英國呼吸緊自由空氣嘅移英港人，你哋個銀包可能越嚟越扁了。

侯俊偉呢份秋季財政預算案，可以話係向「卓慧思經濟學」say no，主打開源節流，唔再做大花灑。其中「開源節流」方面，侯俊偉大幅調高有「暴利稅」之稱嘅能源利潤徵費，從而家嘅25%增至35%；另外，出年1月1號開始，臨時徵收電力生產商45%稅率，移英黃友睇嚟要再擏錫啲用電喇！至於英國打工仔關心嘅個人入息稅率，唔好意思，侯俊偉要將入息稅最高稅率年收入門檻，由目前15萬英鎊下調到125,140英鎊，雖然唔係好多移英黃友有咁高收入，但點都會有掛？

睇返呢次財政預算案，辛偉誠政府其實係想喺高收入人群方面開刀。英國商界領袖、英國工業聯合會總幹事丹克爾就向媒體表示，睇唔到呢份新財政預算案有咩重振經濟嘅計劃。佢仲警告，如果勞動力短缺、同歐盟經貿爭端等問題解決唔到嘅話，英國經濟未來十年可能會陷入沉睡狀態。

過去十幾年，英國GDP好似食咗豬油膏咁停滯不前，再遭遇新冠疫情更係衰多兩錢重。據英國國家統計局公布，截至10月，英國公共部門淨債務已經高達24599億英鎊，相當於GDP嘅97.5%，係20世紀60年代初以嚟嘅最高水準。今年10月，英國嘅通脹率同比升至11.1%，創41年嚟新高。侯俊偉表示，明年英國GDP可能會縮水1.4%。

嘩！講緊成雙位數嘅通脹率喎，移英港人如果覺得依家嘅香港唔再適宜生存嘅話，咁未來你哋嘅英國退休生活可能係地獄級！冇事嘅，捱吓凍忍吓餓啫，有得喺英國就夠晒啦！

英國國內經濟低迷，生活成本高到嚇死人，甚至冬天開暖氣都要就住就住，「80後」辛偉誠想要make大不列顛great again，可能比拜登想搞好美國仲難，唔少移英港人已經生活艱難，依家仲面臨被英國政府加辣「割肉」，真係陰功豬囉。

新上任一個月嘅辛偉誠躊躇滿志，諗住大幹一場，但揸住一手爛牌，本俠覺得，佢有心都未必有力：有錢先有得大幹啊嘛！財相侯俊偉呢份財政預算案實係辛偉誠同意先推出。移英港人喺「祖家」中晒伏，估唔到同自己嘅幻想相差十萬八千里。今次加稅方案都關你哋事，冇得避，不過都咪怨啦，咪當係享受自由空氣嘅消費稅囉，值返晒！

原圖：辛偉誠、侯俊偉Twitter

https://twitter.com/RishiSunak

https://twitter.com/Jeremy_Hunt