英女王伊利沙伯二世逝世，令英國王室最近成為世人關注嘅焦點，有關英國王室嘅花邊新聞層出不窮，為市民增添茶餘飯後嘅談資。本俠最近睇咗唔少英國王室嘅新聞，發現原來被戀殖黃友吹捧到上天嘅英國王室，正正係英國社會不公同英式民主雙標嘅代表。

英女王駕崩後，長子查理斯三世自動繼位成為國王，如果話，卓慧思經保守黨內「小圈子選舉」選舉，贏咗8萬1326票成為新任首相，咁查理斯連半票都冇就成為國王。英國自稱民主大國，成日借「民主」之名，干預他國內政。但從數據嚟睇，首相係由0.17%嘅人口選出，而國王更係得0%。

廢除王室嘅聲浪喺英國社會已有討論，但英國政府似乎容不下廢王派嘅聲音。近日一名22歲女子喺查理斯三世登基會議期間，高舉廢除君主制嘅紙牌，結果當場被捕。英國作家西蒙・希爾（Symon Hill）對住查理斯嘅支持者高叫「邊個選佢出嚟呀？」即刻被警察戴上手銬帶走。嗱，呢啲咪就係黃友成日吹捧嘅英式民主自由咯！點解咁多英國人唔鍾意王室，因為喺英國約6800萬人口中，王室絕對係「贏在起跑線」嘅一小撮人，係社會不公平嘅代表。

英國《泰晤士報》近日發布英國王室成員嘅財富排行榜，啱繼位嘅國王查理斯三世財產估計達9億（約80億港元）英鎊，威廉王儲身家更豐厚，達到10.5億英鎊（約93億港元），但王室成員仲有大量未公開財產，實際身家難以估算。另一方面，據《紐約時報》報道，過去10年，英國民眾嘅生活水準係越嚟越差，面對缺能源、高通脹嘅困境，英國人嘅生活成本大增，向食物銀行求助嘅個案急增，導致庫存短缺，只能縮減食物分包量。

吃盡房地產紅利

沒有比較就沒有傷害，對比當前英國底層民眾水深火熱嘅生活，英國王室嘅財富增長速度，竟然超過咗歷史上嘅任何時期，主要係吃盡房地產紅利。據《泰晤士報》報道，由於英國近年房地產市場暢旺，王室擁有嘅土地同建築物價值都跟住水漲船高。單係蘭開斯特公國同康沃爾公國舊年嘅收益，就分別高達2330萬英鎊同2460萬英鎊，同比增長咗4%和16%。呢啲錢全部落晒王室袋，相當「和味」，其中應該都有移英黃友嘅貢獻。

早前有個住英國嘅香港人喺社交平台發帖鬧爆，指責移英港人「到處提價搶樓，助長英國樓價攀升」，認為香港人將香港嘅問題帶到英國，日後會「遭本地人唾棄」，甚至「令往後港人移民英國成本大增」，帖文喺英國黃圈引起轟動，好多黃友留言同發帖人瘋狂駁火。黃友搶貴英國樓乞人憎唔緊要，至少英國王室會感謝你哋。

英國政府一向精於計算，喺佢哋眼中，移英黃友雖然都係揸住BNO船fare嘅「落搭」之人，但都有三六九等之分。一等黃友銀包有水，到埗就買車買樓，帶旺樓市同消費。二等黃友可能冇乜水，但勝在年輕人居多，到英國馬死落地行，從事當地人唔願意做嘅厭惡行業，填補勞力空缺。對比其他國家或地區嘅移民，黃友更戀殖更馴服，絕對係做二等公民嘅不二之選。

本俠猜想，未來幾年嘅英國應該係咁樣一幅景象：高貴又墮落嘅王室繼續以特權累積財富；能源危機加上高通脹，底層民眾繼續喺生存線邊緣艱苦掙扎；仲有一眾移英黃友，繼續有錢出錢，有力出力，為修補大英帝國呢艘沉船努力耕耘，默默奉獻。

原圖：The Royal Family Facebook

https://www.facebook.com/watch/?v=2100169886842007