黃友移民英國，唔少人都幻想踏上自由之地後，就可以安心做「新英國人」，從此告別佢哋口中「無自由」嘅香港生活。但過到英國先發現，原來自由嘅定義，係生活素質自由落體咁解。通脹破頂，英鎊插水，加上近日蔓延英國多地，涉及多個行業嘅大罷工，令好多衝動移民嘅黃友勁呻中伏，走又唔想，留又難捱，不由感歎「前路茫茫」，上錯賊船呀！

今時今日移民英國，應該係沒有之一嘅最蠢決定。據英國國家統計局數據顯示，英國7月通脹達到10.1%，創咗四十年新高，係G7經濟體中，首個通脹達兩位數嘅國家，認真威威。更大鑊係，英國通脹沒有最高，只有更高，據美國花旗銀行分析，英國明年1月嘅通脹率或高達18%的峰值，係英國央行2%通脹目標嘅9倍。

咁係咪通脹越高，人工就會越高呢？呃，英國係冇呢支歌仔唱嘅，據最新統計，英國家庭嘅稅前年收入中位數係31770英鎊，即係大約29萬港元，月入約2萬4千蚊港元，低過香港28300元嘅家庭入息中位數，即係話，大多數移英港人都搵唔返喺香港嘅人工。由於俄烏戰爭造成能源供應緊張，英國能源監管機構將從10月1日起，將家庭能源賬單上限調高80%至平均3,643英鎊一年，即係話，齋交電費同煤氣費，就花咗一個中等家庭9分1嘅收入。

但對於多數移英黃友嚟講，慘事又點止呢啲，由於通脹爆煲，加上脫歐問題同蘇格蘭獨立浪潮死灰復燃，英鎊兌美元今年已急跌近20%，兌港元隨時跌穿9算。唔少喺早前11算高位接貨，諗住「早換早享受」嘅移英港人，而家慘變「早換蝕幾舊」。對於一早兌定英鎊買英國樓嘅黃友，更加係蝕到入晒肉，一殼眼淚。本俠留意到，有人喺移英群組內呻慘，話「唱貴咗鎊」，抱怨「買咗樓搞到身家大縮水！」

但更差嘅情況可能仲喺後頭，據英國《泰晤士報》近日報道，英揆大熱人選卓慧思，計劃一旦當選後將更加敵視中國，會正式將中國列為「嚴重威脅」，地位同俄羅斯相似。如果中英一旦脫鉤，對英國嚟講，將會承受無法想象嘅後果，英國國內好多基建將因中國缺席而無法進行，如果冇咗價廉物美嘅中國商品，英國嘅通脹將邁向另一個新高。英國前首相白高敦近日警告，由於通脹同能源價格飆升，佢喺自己家鄉睇到「冇諗到會再次見到」嘅貧困景象，抨擊而家嘅英國政府「冇人手握方向盤」。

政治同現實都係殘酷嘅，英國肯定會繼續追隨美國「打香港」牌制衡中國，亦會舉起BNO嘅黃色大旗繼續吸香港水，好多黃友因為對政治有不切實際嘅幻想而參與黑暴，國安法實施後，又不切實際咁幻想揸住本BNO移英，就可以搵到自由嘅生活，點知被現實狠狠摑到口腫鼻青，陷入進退不得嘅地步，問吓班移英黃友，當情緒化同好奇心過咗後，喺生活上你哋仲可以撐幾耐呢？

原圖：無綫新聞截圖+素材網