心水清嘅市民都知，習近平主席、李克強總理、韓正副總理、夏寶龍副主席等國家領導人一講到香港抗疫，講得最多嘅就係「支持特區政府負起主體責任」。點解阿爺要咁話？一方面係考慮到「一國兩制」方針，尊重香港嘅高度自治權。另一方面香港與內地嘅醫療體系、社會管理大有唔同，特區政府作為「當家人」要「睇住盤數」，是職責所在。

自第五波爆疫以來，特區政府履行「主體責任」可謂衰咗一鑊又一鑊，抗疫策略改完又改、信息發放無比混亂、組織協調亂晒大籠，用「倒瀉籮蟹」形容絕不為過。

點解特區政府今次抗疫工作做得咁衰？因為唔少官員和公務員有長期「心病」。譬如：有人不認同「動態清零」、迷信西方「與病毒共存」而Hea做，懶理甚至無視內地成功抗疫嘅做法；有人擔心香港高度自治和個人自由權利受影響，抗拒甚至抵制中央援港抗疫；有人信心不足，對中央指令「你有你話，我有我做」，推卸責任甚至試圖唱衰中央；有人慣性思維、故步自封，不敢特事特辦甚至話「不嬲都係咁做喇」；有人只識做「打工仔」唔識做「大孖沙」，話咗先做、唔話唔做，甚至唔知道自己份糧係邊個出。

政府想做嘢 完全有辦法

出現呢啲問題，就係因為對「一國兩制」唔理解，對「大疫當前」無擔當，對「衣食父母」冇感情。宜家調返轉頭，你就好易明白點解阿爺係都要話「支持特區政府負起主體責任」。有件事要特別留意，夏寶龍副主席曾要求政府官員要「勇於擔當、勇挑重任、踐行誓言」，可謂係「及時雨」，係對官員嘅提醒同埋呼籲，亦都告訴18萬公務員唔可以Hea做。

好彩在阿爺力撐下，政府都仲算蠢唔晒，近排做得好咗少少，包括較高嘅方艙醫院入住率、較權威嘅信息發佈、較貼地嘅醫療支援等等。大家有眼睇，政府想做嘢，完全有辦法搞得掂。

嚟緊政府仲有咩工作要做？一）建立跨部門嘅指揮體系，集中各部門資源和力量為市民服務。二）提升重症患者救治能力，用好公立醫院、私立醫院嘅資源，發揮內地援港醫護作用。三）中央援港物資入港後要有地放、有車運、有人派，快速去到有需要嘅市民手中。四）用好方艙醫院，避免再生亂象。

一句講晒，香港市民有冇餐安樂茶飯食，就睇特區政府能否負起「主體責任」啦。

原圖：星島日報

https://std.stheadline.com/daily/article/2262681/