呢幾日淒風冷雨，第五波疫情爆到阿媽唔認得阿爸，日日幾千確診，死亡人數又一再攀高，人心惶惶，都真係獅子山都為之垂淚！

說到底，新一波疫情來襲，港府卻冇做好提前準備！海嘯式爆疫，令本港醫療系統崩潰！有媒體用「瀕臨崩潰」，依筆者看，根本係已經崩潰！大家睇到確診者抱病救醫那種無力感就知！多間公院須在露天位置，隔劃出分流區處理病人，不少病患戶外臥床，當中不乏長者及幼童，風寒雨冷，睇見令人鼻酸不忍！有人說是去了印度，有人感嘆香港一夜回到第三世界！無助市民發出哀號：點解香港變成咁？

依我看，不就是庸官無能，害慘全民！有人說得好，確診者叫天不應叫地不靈嘅慘況，醫管局高層一句「非常不好意思」就值逾6百萬年薪？若然，阿貓阿狗也可勝任！這6百多萬年薪不是比倒錢落海更不堪？倒落海，起碼濺起水花漣漪，成為一道風景線吖！

民怨沸騰，都怪一眾高薪厚酬者無能，平時又不燒香，臨急抱佛腳，梗係搞出個大頭佛啦！

政府高官，抗疫兩年多以來，只知往自己臉上貼金，從不肯虛心訥諫，庸官一味話抗疫鬆弛有度，甚至話做到「滴水不漏」，當真唔知個「醜」字點寫？如果真係咁掂，又怎會搞到依家一鑊粥吖，仲要驚動阿爺下指導棋，作出重要指示：香港特區政府要切實負起主體責任，把盡快穩控疫情作為當前壓倒一切的任務，動員一切必要的措施，確保香港社會大局穩定。阿爺並非只口講，語音未落，這邊廂國家隊重量級抗疫人員已千里馳援啦！教港人深深體會何謂「中國速度」和行動最實際！

而港府抗疫卻一團糟！連發放資訊都亂過亂世佳人，最慘係連叫市民「居家隔離」，卻對留家等候嘅感染者全無指引。家居自療有重症和輕症之分，重症者即送院急救乃天經地義，而輕症者不妨留家服退燒藥在家休養，這是「非常時期」的可行方法；問題係政府有關部門要給予病人一些明確指引和援助，才可以釋病人疑慮吖！

事實證明，醫療系統之所以崩潰，固然因之前冇未雨绸繆，臨渴掘井梗係倒瀉籮蟹啦！這是人禍多過天災吖！吾友區博士捎來朋友吳振武一則《偶題》，頗能道出「天下苦娥久矣」之鬱憤：

香江虎歳奏哀歌，滿目瘡痍枕藉多；

涼薄無能枉自大，從今弄瓦怕名娥！

相信道出許多市民嘅心聲。

原圖：星島日報

https://std.stheadline.com/realtime/article/1418261