海嘯式爆發嘅第5波疫情，令本港醫療系統崩潰。大家都睇到，公立醫院隔離設施已經超出負荷，多間醫院戶外設置多個帳篷及病床，讓大批染疫病人在該區域等候，當中包括伊院、明愛醫院、聯合醫院及博愛醫院。從新聞圖片可見，染疫者瞓喺戶外病床。有朋友話：戶外風大又凍，唔病死都凍死！有啲話：有床臥吓都算好彩！有啲甚至話：同印度冇乜分別！

抗疫兩年多，庸官但知自吹自擂，明明漏洞百出，卻吹噓甚麼寬嚴有度，甚至夠膽死話「滴水不漏」，真係知唔知個「醜」字點寫？事實上，一直都有立法會議員疾呼，疫情爆到九彩，好應該倣效內地實施全民檢測，但「好打得」嘅林鄭一直不屑一顧，依家疫情已經爆到失控，社區隱形源頭不明病例亦如天上繁星，已不能夠一一去數清楚。大家有眼睇，連好幾個高官、議員嘅司機、工人都中招。再講吖，先前圍封強檢，多數揪不出病例，依家次次「有料」到，不揪出十宗八宗確診，算你好好彩。阿哥，疫情已爆到人心惶惶，分分鐘自己中招都唔知乜事。

抗疫不力 衰過躺平

庸官口講堅持「動態清零」，實際衰過躺平！不是嗎？其中有老幼孕婦染疫未獲送院；有李女士一家五口中招多時，依然冇法送院，佢哋多次致電政府部門卻無人接聽，真可謂叫天不應，叫地不靈！

多間老人院爆疫淪陷，日前深水埗溫暖護老院有4名院友確診，其中一人不治。期間有10名職員報稱發燒及喉嚨痛，佢哋被困護老院5日仍未獲送隔離，亦冇物資支援，職員除咗憤怒就係無奈：剩低我哋喺度等死咩！而實情係老人家染疫亡嘅愈來愈多！

此時此刻，有鄭久慧2月15日博客來論：《科學抗疫，拯救港人生命》，文章一開篇就說：「醫者父母心！港大醫學院堅持科學抗疫⋯⋯倡議特區政府實施『封城』，否則疫情將喺3月中達到高峰，日均確診逾萬宗，本港醫療系統將崩潰（按：實情已崩潰），到6月中勢釀千人死亡的慘劇！」

鄭久慧悲天憫人，力陳「封城」將挽救大量港人生命，又冀香港切勿重蹈「東京大爆發」嘅慘況。人命關天，庸官切勿口中「動態清零」，實則衰過「躺平」；切勿攞市民條命較飛！再不「禁足封城」及「全民強檢」，再議而不決，決而不行，錯過一次又一次清零機會，香港「死得人多」，試問庸官該當何罪？相信沒有人會希望看到疫情持續蔓延失控，我們要以傷亡慘重來迎接香港回歸祖國25周年吧？

原圖：星島日報

https://std.stheadline.com/realtime/article/1418261/