近來唔少台灣藝人選擇到內地發展，有啲甚至成績亮眼，頻擔任主角、節目主要主持人。食得中國呢行飯，就應該一早表明自己嘅立場，因為大眾拒絕邊撐台獨邊搵人民幣嘅劣跡藝人，呢點對返內地工作嘅香港藝人亦一樣。

近日，台灣藝人「小S」徐熙娣及張鈞甯被質疑係台獨，此次「台獨風波」引嚟網民狠批，最終甚至要國台辦幫口澄清。但諗深一層，如果佢哋喺選擇返內地工作當時，已經一早表明「我是中國人」、「我拒絕台獨」的話，又點會引起呢啲風波呢？所以話，唔想畀人誤會，「愛國」係需要講出口。

小S喺東京奧運期間，喺IG發帖話支持、恭賀中華台北選手，當中佢用咗「國手」嚟形容中華台北選手，引起內地網民不滿，事態更發展到多個內地品牌終止同小S合作，小S事後曾發文為自己澄清。

張鈞甯論文題曾用「我國」

張鈞甯則被爆過去碩士畢業論文題目中包含「我國」兩字，而被內地網民質疑佢係台獨，事後佢經由工作室發文補鑊，表示張鈞甯堅定自己是中國人。

兩位嘅「台獨風波」引起大眾關注，搞到連國台辦都要幫口澄清。國台辦發言人朱鳳蓮15日表示，內地支持台灣藝人過嚟發展，指最近接連發生「在內地正常發展的台灣藝人被網絡炒作」，令人懷疑係咪有台灣政治勢力蓄意製造事端，企圖干擾，阻撓台灣演藝人員喺內地發展，影響兩岸關係。朱鳳蓮更呼籲兩岸同胞要「精準辨識，反對離間」。小S隨後發文，感謝國台辦幫佢澄清。

希望徐熙娣及張鈞甯今次事件，可以作為一個引導作用，畀一啲仲未表明立場，但又想賺人民幣嘅藝人知道，「我是中國人，我反對台獨」係要一早講出口。

原圖：徐熙娣微博圖片、張鈞甯微博圖片