有人說， 抗疫逾年、身心俱疲嘅香港市民終於見到天邊一丁點曙光囉！咁又係，確診數字漸見回落，雖然話假期過後或有機會反彈，之不過，人日初七大家終於可以有堂食啦！延至晚上10時，並由2人放寬至4人一枱，我妻我子我女終於可以聚首一堂食餐飯囉！原本看似理所必然嘅小事，依家庸官畀小小「甜頭」，小市民竟眼噙熱淚，熱血往頭上一湧，真要感激林鄭政府恩慈，忽然又感到食衛局局長陳肇始好似冇咁乞人憎。

過去一年，大家活得很不是味道！有人又認為，全球進入「封鎖」啫，但人心無法被封鎖，這是一段「封而不閉」嘅日子，幾乎每個人都被迫直面自我，重新思考人與自然、人與生命嘅關係。旨哉斯言！眼見一場世紀瘟疫，奪命無數，筆者一顆冰封的心，忽然更珍惜活在當下的意義。

基層大眾活得迷失

過去一年，大部分人都更深體會「生命無常」：在新冠肺炎疫情肆虐下，多數人感到活得疲憊不堪；港人面對庸官抗疫無能、經濟凋敝、開工不足、失業威脅下，日子頓失方向；嗰位有天才局長之譽嘅勞福局局長羅致光又話最低工資不能反映貧窮，唔夠錢使呀？去申請綜援啦！面對一個如此涼薄嘅政府，基層大眾活得「迷失」，感到無助，那是必然的了！

之不過，有人歡喜有人愁。筆者草此文時，酒吧、夜總會、卡拉OK、派對房間等夜場為主嘅場所仍未解禁，料至少20萬打工仔「聽乞食」；業界亦質疑是否病毒又會擇時辰、地點「蒲頭」？有人就話喇：唔通酒吧解禁，病毒餓酒太久，必出來「溝女」：小姐，可唔可以請你飲杯嘢？接住「飲醉少少就有親密行為」？政府唔通係為婦女多設想？總之，庸官就話希望業界包容同體諒喎！佢哋就係諗唔起夜場為主嘅酒吧、夜總會都要交租、畀員工人工？

庸官政策堅離地，大家亦都習以為常。講到呢度，筆者想起美國有媒體發起一個活動，叫讀者用一句話總結過去一年，奪得冠軍嘅竟然係密歇根州一個9歲小學生，佢話「感覺就像是過馬路之前，你注意了左右看，結果卻被潛水艇撞翻了！」香港今日搞成咁，連國家主席習近平也為港疫情擔憂，究竟香港衰成咁被乜嘢撞翻了？

全城已谷到一肚火

嗱！新冠肺炎股情下，廢官無能，靠害市民！淨係粵港通關都一味拖，全城已谷到一肚火！加上經濟凋敝，民生多艱，無能政府應幫嘅唔幫，唔該幫嘅就幫凸，整個政府問責團隊嘅民望有乜辦法唔繼續沉底喎！

有民調機構日前公布最新民調結果顯示，特首林鄭民望淨值跌至負52個百分點。在司長表現方面，被嘲為「避政司司長」嘅鄭若驊評分繼續「墊司底」，民望淨值為負50個百分點。全完係意料中事，屬「慣性定律」，鄭若驊跌者恒跌，民望跌趴街大家預咗！

今日香港，被乜嘢撞翻？阿哥，畫公仔唔使畫出腸啩！

原圖：星島日報

https://std.stheadline.com/realtime/article/1188436/

https://std.stheadline.com/realtime/article/1274468/