繼區域法院法官郭偉健後，又有法官畀黃友針對！人民力量「快必」譚得志捲案，多個反對派人士昨午（9日）開記招聲援，其中荃灣區議員譚凱邦竟然借故話要寫信投訴蘇文隆裁判官，唔想佢再審反修例相關案件咁話！唔知大家又有咩想講？

引案例斥蘇官立場偏頗

譚凱邦借快必一案批評警方濫告，「希望博一博，去到法庭遇上一個『親建制嘅法官』」，又話好擔心日後會有好多「明明清白嘅人」畀人誣告，然後喺法庭遇到「親建制法官」而被還押「坐冤獄」云云。譚凱邦打蛇隨棍上話要正視「紅官」問題，更點名粉嶺法院裁判官蘇文隆，舉例指蘇官立場偏頗，曾經重判社工劉家棟一年監禁，又曾要求快必支付10萬元保釋金等。

被質疑與建制做法類似

譚凱邦話希望蘇官唔好再審理相關案件，佢會去信投訴法官行為秘書處，投訴蘇文隆裁判官。有記者就問，近日有建制派亦要求某啲法官唔好處理反修例案件，質疑譚凱邦做法同建制類似，又問佢怕唔怕影響司法獨立；咁嘅問題梗係難唔到不嬲都雙重標準嘅黃友，譚凱邦話唔會評論建制派做法，而佢自己咁做係要畀人喺司法獨立之外睇到公義喎，果然黃友做乜都係有大條道理嘅！

原圖：司法機構資料圖片、譚凱邦Facebook直播截圖