《港區國安法》通過並落實，一眾牛鬼蛇神全現形！《港區國安法》果然係香港「一國兩制」行穩致遠，重拾繁榮嘅定海神針，其震懾叛國禍港、洋奴漢奸嘅作用，以前就話反中亂港有運行，愛國愛港做老襯，家陣國安立法要一眾漢奸走狗出得嚟行，一定要還！真係大快人心！

堵塞香港國安漏洞

國安法堵塞香港維護國家安全嘅漏洞，列明分裂及覆國家政權罪行最高可判終身監禁；案件嚴重者，可送內地審！唔怪之得話「阿婆走得快，必定有古怪」喇！連啲搞「香港獨立」嘅暴民，都紛紛棄保潛逃，活脫脫上演「叫人衝，自己鬆」嘅狗熊鬧劇！可見港區國安法的確立竿見影，真係極速止到咳！

眼前無路、漢奸洋奴想回頭亦已經太遲。中央果斷出手，《港區國安法》有震懾氣勢，一眾「港獨」、「攬炒」派紛紛割席，一時「退出江湖」、一時「金盆洗手」、一時「國師」身份變鵪𪂹。最好笑嘅係以「民主自決」、大言炎炎嘅香港眾志嗰位向有「黃衛兵」之稱嘅黃之鋒，知道若然再牙斬斬只會死得慘，佢第一個跳出來宣告退出「香港眾志」，之後前主席羅冠聰、常委周庭相繼退出，最後「民主未決身先死」，來個「自我中箭」，裙甩褲甩即時宣布解散「香港眾志」！霎眼間，「香港眾志」便飛灰煙滅！喂！驚到三魂唔見七魄，之不過，之前眾籌嘅款項，切要交代清楚，咪詐詐諦諦話中箭要用來療傷止血喎！

熱血勇武變靜靜雞

難怪有人話，一眾政治小學雞，睇來連胡適嘅「寧鳴而死，不默而生」都唔buy咯！面對國安法呢把達摩克利斯之劍已高高懸起，叛國禍港嘅洋奴漢奸固然驚到屁滾尿流，惶惶不可終日！啲暴民都由先前嘅熱血勇武，變咗靜靜雞，認低威！兄弟爬山，變成田雞過河，有難各自各撐！有乜事，大家夢中商討吧！

筆者只係想提醒年輕人、學生們，切勿以身試法，又走去堵路破壞交通燈和設施、縱火等，因呢啲行為屬「恐怖活動罪」！再被拘捕，冇咁好彩又保釋又判感化，甚至被裁判官讚「精乖孩子」㗎嘞！切勿相信訟棍廢噏甚麼「坐監令人生更精彩」！收拾心情回校園，畀心機讀好書，多啲討論功課，愛上圖書館多過鍾意佔領馬路，未來才可貢獻社會，服務國家，未來人生，才會真正精彩！

原圖：無綫新聞截圖