原本答應左大家今日講沖繩既Duty Free的。可是筆者見到有好多人喺團購度中左伏，所以臨時抽調呢篇文章出黎先。 好多人都知道，今時今日買上網卡去旅行係又方便又平過租WIFI蛋架啦。但係邊張卡抵用，邊張卡有咩限制你又知唔知？ Docomo 4G LTE 7日無限上網數據卡 近日，團購網係咁推上圖嗰款Docomo 4G既無限上網卡，聲稱七天內可以任用無限數據。就咁睇大字報就梗係吸引啦！結果好多網友都落左搭，但係大家只要留心睇下細則既細字仔既話，就會見到佢寫明“每日首100MB享4G LTE，其後限速3G 128kbps無限上網”。嘩！每日實際上得100MB用，放張相上Facebook，睇下Youtube就爆，之後得番128kbps。仲有一件好重要既事要話比大家知既係，日本既4G制式同香港係唔同的！香港既4G除左數碼通係用1800MHz外，其餘主力都係2600MHz，但係日本Docomo既4G係用1800MHz同2100MHz的。而當中既1800MHz只限東京、名古屋同大阪市區使用。咁即時話就算你買左呢張卡都好，過到日本都未必成日收到4G！咁大家明白點解佢要團購散貨啦！ 日本富士卡無限速 今日筆者介紹一張我平時用張既上網卡比大家，就係上圖既日本富士卡。呢張卡好簡單，七日有效期，總用量係1.8GB，3G無限速，亦無任何網絡限制，使用日本Softbank網絡。一個正常既香港人一個月大約用1-2GB，所以呢張卡有1.8GB比你用七日係非常夠用。而最重要既係，呢張卡係無任何使用限制的，你可以將佢放入WiFi蛋同人Share用又得，睇myTV、上Youtube、開Facebook甚至用Whatsapps講電話都無問題。另外，當你開通左張卡之後，每日你都會收到ＳＭＳ提示你之前一日用左幾多用量，同埋剩番幾多用量的，唔駛驚會用爆，非常細心。 最後最重要既梗係價錢啦，呢種卡喺深水埗既街鋪有得賣，大約HK$150一張。另外Yahoo拍賣我見過有人賣HK$110。大家可以比下價。但係某團購網團購價都要HK$148。咁就真係睇下你個人喜好喇。 想知多啲遊日既小貼士？多啲留意ＨＫＧ報既旅遊介紹啦。星期日會補番沖繩Duty Free篇，敬請留意。 圖：由作者提供