今日黎到日劇《海女》嘅重要場口，就係小袖海岸喇。每年七月至九月，一班海女就會喺呢度表演潛水捉海膽比大家睇，入場費係五百日元。不過唔止有得睇，比多五百日元，仲可以即食即開嘅海膽，係咪好吸引呢？一齊黎睇下啦。 平時要去小袖海岸，一係就租車自駕，一係就搭過百蚊港紙的士去，去年好彩，有觀光巴士，除左可以去睇海女之外，仲會去埋琥珀博物館同土風館，絕對係唔錯嘅選擇。但係觀光巴士不一定每年都會開辦，準備前往觀光嘅你，請先上久慈觀光公社嘅網站了解下，預早準備交通。好喇，開車出發！ 沿山路行仲要係單線雙程行車，自駕嘅朋友小心喇。 一落車，就會見到呢塊石埤，上面寫住「Je, Je, Je」。咩黎？係久慈嘅鄉下話，意思係驚訝咁解，如果再驚訝啲嘅話就會再加多一個Je，如果再再驚訝啲嘅話就再加一個Je。有睇日劇嘅朋友一定知架喇。無睇過嘅朋友你依傢係咪好Je Je Je Je Je？ 終於黎到小袖海女嘅辦事處，二樓係Café。地下呢層係售票處同埋售埋紀念品的。當然，唔少得有海女裝扮嘅女子同遊客合照同傾計。 海女出場！！同大家解釋下先，海膽係生長喺冰冷水域嘅生物，所以就算七月至九月係夏季都好，但係海水嘅溫度大約只有十度左右，所以唔好睇佢地短袖短褲咁落水好過引。一掂到水，佢地幾個都叫左出黎。 首先要適應水溫，然後用海帶黎洗潛水鏡，原來用海帶黎擦下鏡就唔會有霧！ 上水，一袋滿滿嘅海膽，遊客就開心喇，因為可以開餐。 工作人員已經準備好水同工具，等一班海女表演埋下半場，即開海膽。 即開，洗下佢，再挑走條腸，咁就食得。 唔好講笑，當你食緊佢嘅時候，佢啲針仲識郁架！所以唔好咁大力拎住佢，放輕隻手浮住佢就唔會吉親。新鮮嘅海膽係好綿的，好似食緊蛋黃咁，又好似大閘蟹嘅羔，鮮甜好食，同香港大家食到嘅味差好遠，香港嘅海膽有陣怪味，又臭臭地咁，新鮮嘅係完全無呢回事。鍾意食海膽嘅朋友，一定要黎試下！ 呢度仲有雜錦煮食，唔好問喇，有冇睇過日劇都試左先講啦。 如果就咁影下相就當寫左一篇文章，我係讀者都唔收貨啦，所以我拍左片比大家睇。 [embed] 下星期，繼續海女行程嘅另一個景點，久慈琥珀博物館。下星期日見。 圖：由作者提供。