今集，我地再由墾丁大街出發，往南行約3公里路（即係荃灣至深井既距離）就會到達船帆石。

船帆石

從上面谷歌地圖我地可以見到，除左塊石之外，其實呢度只係一條大街。不過咁，由於呢度咁近海既關係，所以除左墾丁大街之外，亦都有好多旅客喜歡租住呢度既民宿。佢一行出馬路就可以游水。另外，船帆石呢度有浮潛玩。鍾意水上活動既朋友，可以考慮下住呢度既，不過要食野、買野同行街就.......都係住墾丁大街吧。

鵝鑾鼻

離開船帆石，又向南行5公里（前後我地行左8公里架喇，即係由銅鑼灣去到柴灣）跟住你會見到一個大停車場，而呢度就係鵝鑾鼻公園！ 公園門票NT$40。開放時間係24小時。 不過泊車要比錢，一部“電”單車都要收我NT$10。我話我呢部車用電架喎又唔係機車，佢都要照收。算吧，幾蚊港紙而已。 睇相睇到呢度停一停先，介紹下上面呢兩塊石，叫做親吻石。情侶黎到呢度都會DO起個咀影番張相。大家黎到記得影番張呀，好喇繼續…… 黎得鵝鑾鼻當然要同個燈塔影相，話晒呢度最出名就係呢個燈塔。提提大家，唔好以為去到燈塔就等於去到台灣既最南點。其實你再向南行10分鐘左右，你先至叫去到台灣最南點的。去到既時候，有個牌話你知你已經到左台灣最南點架喇。不過我懶得行無去到，比個網址大家睇下啦（http://www.uukt.idv.tw/_tw/photomap/photomap.php?kd=3&ad=15&bd=5）。不過記住，台灣最南點係要離開左鵝鑾鼻公園先去到的。大家睇番本篇文章第一張地圖就會估到點行架喇。

風吹砂

離開左鵝鑾鼻之後，沿住條大馬路向東北U番上去玩，過埋龍磐，大約6公里車程之後，就會去到風吹砂。 風吹砂係一個自然景觀，大家停一停影張相就可以。其實過左鵝鑾鼻之後，地圖東面既景點，全部都係呢類型既自然景觀（包括風吹砂、龍磐、佳樂水）。而每一個點既門口，都會有一排泊車處比你泊車的（就好似去西貢燒野食咁）。鍾意自然奇貌既朋友可以每個點都去下，否則既話，好似筆者咁，到此一遊就算了。因為由墾丁大街去到風吹砂已經要14公里路程，一來一回要30公里，即係來回屯門公路三次。如果你租車都還可以，但係如果你租電單車的話，少啲體力都唔掂。 圖：由作者提供，地圖及街景地圖取材自谷歌地圖。

投票已截止，多謝支持