墾丁大街當然係墾丁篇既最重要一站。所有食肆，行街買野，搭車往返市區都集中晒起呢度。短短既一條墾丁大街，有超過一百間民宿你話利害唔利害？不過咁，呢度其實都幾似香港既廟街，一條街由頭行到尾，兩旁就係攤檔，所以唔會迷路的。好啦，睇少少相再講吧！ 當你搭左幾個鐘頭車，而你又見到上圖呢間麥當勞之後，就表示你已經進入左墾丁大街了。而喺高雄坐的士或公車既你，就會喺呢間麥當勞對面（即係筆者企喺度影相既地方）落車，呢度係一間7-11來的。當然，呢度只係墾丁大街既入口，視乎你間民宿既位置，你可以再搭多一至兩個站。不過，墾丁只有呢一間麥當勞。 所以你認住呢間麥當勞，同人溝通同求救就實無死。 過左7-11之後，行前少少再轉個靚彎，就會到達墾丁大街既中段，呢段就係行街買野食野既好地方。買野我唔多講了，大家去得墾丁既話，間間都會入去望架喇。至於手信鋪方面，鍾小勤就最出名喇。至於食野喇喎，以前有間叫迪迪小吃的非常好味，可是當地人話近年差左好多。但係未食過既朋友就話好食喎。我每次去都係食呢一間，所以無其他食肆介紹，大家照睇相，食唔食就自行決定喇。 以前去親墾丁，每位當地人都一定會推介你去呢間食野的。聞說十多年前，迪迪小吃只係墾丁大街旁邊既一個車仔檔。點知炒下炒下，小吃小吃下，就越黎越出名，之後仲開埋間鋪，搞到晚晚要訂位先有得食添。迪迪小吃既位置都幾隱蔽，簡單講就係喺希臘風情民宿旁邊。但其實呢度係小路來的。第一次去睇地圖都無大幫助，都係問人把啦。 至於迪迪小吃食乜既呢？其實呢間算係小小印尼，又小小泰國菜既口味既餐廳，總之就係以炒野出名，炒河就最正喇！另外炒菜，辣蟹等等都好拿手。但係筆者提醒大家，呢度既炒野係好大碟的。三四個人食絕對無問題。所以如果你兩個人去食的話，落單時可以叫佢炒細碟啲，收費會平少少的。放心，佢會同你講明幾錢架喇。而上圖果碟炒河已經細碟左架喇。你話兩個人點食得晒？收費方面，一碟炒河大約港幣60-70蚊左右，辣蟹就好似接近二百蚊港幣。對比起香港，收費其實差唔多，但係如果你用台灣既感覺去食就會覺得貴左少少。點都好啦，有興趣既朋友可以去試下。 圖：由作者提供，地圖及街景地圖取材自谷歌地圖。