和歌山有兩大景點，一個係白濱，白濱係近海既地方，有一個漁市場。連Go Japan!都有介紹過的。而另一個景點就係今集介紹既貓站長喇！

要去探貓站長，即係要搭和歌山電鐵。和歌山電鐵既市區總站位於JR和歌山站內。所以如果你由奈良、大阪、京都等地想去探貓站長，最好選搭JR路線。因為其他私鐵線只可以去到和歌山市站，要搭和歌山電鐵既話就要再轉多一程車。

由於筆者係住機場酒店既關係，所以本文由機場出發。搭巴士直達JR和歌山站。

機場地面出口一出，就會見到一排巴士站，可以去京都、奈良、和歌山同大阪市區。當中和歌山線每小時有兩至三班車。車程約40分鐘。總站係JR和歌山站，一程坐到尾只需￥2100，方便快捷！

上圖就係JR和歌山站外既巴士總站喇。

而我身後（即上圖）就係JR和歌山站東口。有件事要留意既，由於和歌山電鐵總站係位於JR和歌山站內，所以你從外面係搵唔到和歌山電鐵既入口同指示牌的（你話激死唔激死？）大家只需要直接踩入去JR，搭過JR既朋友都知每個站既入閘位置旁邊總係有一條無閘機但係有職員收票既通道。你行過去同職員講搭和歌山電鐵佢就會放行，唔識日文既話，比本旅遊書佢睇就OK。

而JR和歌山站東口既旁邊有呢條隧道，可以通過去路軌既另一邊，即係西口。西口有個大商場，陣間會介紹。

剛才講過，你同JR職員講你想搭和歌山電鐵之後，照行入去，搵9號月台，就會見到上圖既指示，呢度就係和歌山電鐵既總站，而售票機等等全部位於月台上面的。行上去吧！

睇到呢度先，筆者推介大家係唔係都買1日乘車券，每人￥720。因為來回和歌山及貴志既車費就係￥720，所以買定1日券方便好多，可以中途上落都得。好喇，上車喇。去程搭到士多啤梨號。

約35分車程，終於去到貓站長既總站──貴志站。

呢度有一間CAFÉ，其實同時係候車室，有冷氣的。唔食野都可以任坐架。車站既另一邊係一間好細既紀念品鋪，有火車模型，T-SHIRT等等得意野賣。好喇，係時候探貓站長喇。

大家可以睇到，貓站長其實住起一間木屋入面。（其實本人覺得似神枱多啲=.="）遊客係要隔住塊玻璃同佢影相的。不過貓站長見慣世面，半個鐘內郁都無郁過，串咀。探完貓站長，走了。時間多既朋友可以去附近既土多啤梨園摘啤梨。

回程搭中貓站長號，全條線，除左扭蛋公仔號之外，最靚係呢抽車！

睇下，呢部車靚幾多？仲有多啦A夢同埋圖書任睇。落左車之後，過番去西口，即係本文一開始果個商場，就係MIO。

MIO樓高三層，地下同地庫主要係食肆。一至二樓係時裝店，三樓係一間大書局，CD鋪同埋3 COINS！！3 COINS 顧名思義就係比三個￥100就可以買到野，係買手信既好地方，同時呢度亦都有好多平靚正既嘢買架！！

之後返到地下，食日本最出名既小食，鯛魚燒。不過今次特別啲，係鯛魚燒綠茶雪糕！！孤獨的美食家都介紹過架！

今集去到呢度為止。下星期講乜好呢？其實，當大家睇緊呢篇文章既時候，我已經身在日本既金澤食緊金箔喇！今次既日本之行，我會去金澤、名古屋、秩父，當然唔少得東京市區啦。不過旅遊介紹會遲少少先出，因為去年九月既岩手之旅可望於三月內刊登，然後四月應該會講番台灣，介紹墾丁！好好睇架！之後先會再寫今次旅行既地方。總之，留意住HKG報，就可以有最新最齊全既旅遊資訊啦！

圖：由作者提供