上兩集介紹過心齋橋同道頓堀，基本上，行得心齋橋同道頓堀就一定係黐住行埋難波，就好似香港既太子旺角油麻地咁。不過大阪慘啲，想搭車都無，焗你一定要行咁滯。今篇文章我調番轉，介紹大家由惠美須町開始行番去難波。其實惠美須町喺難波附近，由惠美須町行過去難波只須10分鐘左右。加上惠美須町其實好多嘢睇，好啱宅男。所以今日大家就由惠美須町站落車，沿出口1A或1B一齊陪我行啦。 一出地鐵站，你就會見到上圖呢條日本橋筋商店街。其實惠美須町呢度被人形容為大阪秋葉原！同樣有女僕Café、二手電腦電話店鋪、同埋賣大量動漫玩具既商店。 其實途中有幾間大型模型店唔俾人影相。我用文字描述吓啦，入面有4層樓高，分層咁賣唔同既模型，包括手槍、飛機、四驅車、遙控車等。而筆者就買左部1:32既大阪巴士模型返嚟，￥5000，好鬼抵。當日仲見到唔少香港人排隊買野嚟。 跟住，我地要行過去難波了.....首先介紹既係NMB48 Shop。 NMB48 Shop入面唔影得相，唔係好大間，主要係售票同埋賣Fans嘢，例如Poster、CD同圍巾等。想睇精品，就要行多兩步去旁邊果間AKB48 Shop & Cafe喇！ 之後筆者再入埋AKB48 Cafe食嘢，味道唔錯的。仲唔係好貴。 叫得AKB48 Cafe，當然有AKB專有既嘢，例如有啲食品有杯墊送，某啲套餐有得同店員玩包剪鎚等等。離開左AKB48 Shop & Café，就繼續去附近既鋪頭行吓。 當大家見到NMB48 Theater呢個牌既時候，右手邊有條通道可以通過去難波站的。就係咁近！如果下次你帶埋女朋友去行街，而佢行到樂而忘返時，記住自己過嚟惠美須町睇下嘢喇。 下星期日，帶大家上和歌山，探下已故既貓站長！下星期日見。 圖：由作者提供