道頓堀位於心齋橋同難波之間，打橫既一條河以及附近既一條飲食街。當中最出名既當然係大大個固力果廣告牌同埋激安之殿堂啦，亦由於道頓堀夾起兩個旅遊點之間，所以無地鐵直達，就算夾硬黎計，最近既都只不過係日本橋站。所以一般遊客都係由心齋橋出發，一路行到去道頓堀順手食埋野。今集除左會講條河之外，仲會介紹兩間食肆比大家，一間係極出名食蟹既，另一間就係排隊排成個鐘既大阪燒。 睇到呢度，補充小小啦，上面見到有張相寫住戎橋筋，同心齋橋一樣都係一條買衫既步行街，一路直行就可以去到難波，而我拍照既地方，亦即係戎橋筋既正背面就係心齋橋喇。首先玩左條河先，上船喇...... [embed]https://www.youtube.com/watch?feature=player_embedded&v=2R3YzF8NC8g[/embed] 觀光船全程大約20分鐘。每人￥700，售票處位於激安門口。星期六日勁多人，要下午買定夜晚飛，閒日會好啲。最夜收9點。好喇，坐完船行陣街先。 跟住去食大阪燒喇！呢間叫美津の。位於道頓堀中間既一條巷行入去。（見下圖） 上面呢間就係喇，有中英文餐牌的，入面唔算好多位，一般情況你都要預左等一粒鐘。 上面係我張枱， 師傅係會喺你面前即整的，所以好睇又好食。不過師傅整野食其間係嚴禁拍攝的，製成品如下圖： 整好喇，一路熱住佢一路逐少逐少咁食。呢兩件野，每件百幾蚊港幣。抵唔抵？一件都幾飽肚架，同埋真係好好食。 好喇，食完大阪燒，第二日，筆者去左食蟹。 呢間蟹道樂，道頓堀好似有兩至三間分店。同樣有中英文餐牌的。入去食野要除鞋的，所以想去食既話，著輕便啲會方便好多。 上面見到既已經係最貴既餐，都只係四千幾，由生蟹到熟蟹都有得食。鍾意食蟹既朋友一定唔可以錯過！超好食，本人最鍾意係生蟹同埋炭燒蟹，好有蟹味。 圖：由作者提供。