日光，係近年港人常去既新旅遊點。加上日光市大力宣傳，仲話日光係日本之光咁話。所以筆者都專程入黎睇下。一般黎講，要由東京市前往日光/鬼怒川溫川的話，就要由淺草搭東武線直達鬼怒川溫泉站（特急班次車程約127分鐘），又或者從淺草搭東武線經栃木站轉東武日光線前往東武日光站（特急班次連轉車車程約150分鐘）。不過其實，只要你有JR EAST PASS的話，除左可以任坐JR線之外，仲可以搭一條非JR路線的。就係下面呢條Spacia 鬼怒川號，由新宿直達鬼怒川溫泉站（只有特急車，車程約127分鐘）。 舒舒服服，坐左兩個鐘頭，就黎到鬼怒川溫川站喇。鬼怒川話晒係溫泉之鄉，一出站就有免費溫泉比你浸下腳。 不過今日筆者唔係帶大家去浸溫泉，而係帶大家去探下忍者，去日光江戶村。 行過少少，黎到巴士總站呢邊，搵番3號月台，就有巴士去日光江戶村架喇，約一小時一班車，車程15分鐘，車費￥410。 日光江戶村 落左車，右手邊就係售票處，入場費唔平架！成人每位￥4700，不過只要你出發前，上日光江戶村網站下載張優惠券就可以九折入場。網址呢度＞ http://edowonderland.net/zh-tw/ 繼續周圍參觀下： 呢度既一草一木都好有江戶時代既感覺，你除左可以周圍搵街上面周圍遊既忍者影相之外，呢度有兩個忍者劇場係非常好睇的（分別係忍者大劇場，同埋忍者之隱居宅）。你可以近距離睇下忍者武打表演，忍者飛標等等，一定要睇！呢度仲有少量付費既攤位遊戲，都係射箭同飛標呢啲同忍者相關既野。可惜當日落大雨，否則會好似迪士尼咁有大街巡遊，巡遊時會有忍者喺大街兩旁既樓宇上面跳黎跳去，仲會喺你面前大打出手，又係非常精彩的。肚餓既話，呢度有足夠既食肆，食肆反而唔貴喎，上圖個炒麵都係￥500。 鬼怒川呢度除左呢個日光江戶村之外，仲有一個大型主題公園，東武世界廣場， 同樣受遊客歡迎。東武世界廣場係一個小人國， 內有以1/25比例，精巧重現包括45個世界遺產在內的102座世界知名建築的世界建築博物館。入場費￥2500， 一次過去晒東武世界廣場及日光江戶村會有優惠，大家上佢地既官網就可以睇到。 網址呢度＞http://www.tobuws.co.jp/cn/ 離開既時候，影番張巴士時間表比大家睇。大家可以去番鬼怒川溫泉站轉車去你所住既溫泉酒店，又或者搭免費穿梭巴士去JR日光站，轉車去宇都宮；或者經東武日光站搭東武線去番東京市既淺草。下一集，我地會去埋日光，比大家睇下自稱日本之光既日光究竟有幾咁靚。由江戶村呢度出發，車程約30分鐘。下星期日見。 圖：由作者提供