曾灶財千古咗十年，最近有不少香港人責怪政府無盡力保護佢留低嗰啲當年周圍寫嘅字迹，仲上升到保育層面，認為財叔嘅筆墨係香港歷史遺產。 睇完段新聞，小弟笑到窒息之餘，不禁又諗起「智慧型」香港人這個詞彙。 曾灶財在世之時經常話香港九龍好多地方係佢祖業，但又拎唔出甚麼證據，之不過，就算有又點吖！歷史向前行，朝代相興替，有千年嘅文物或建築，但就不會有千年嘅物主，唔通姓贏嘅走去爭番萬里長城，姓朱嘅走去爭番紫禁城，姓劉嘅出來爭番金縷玉衣咩？ 最好笑就係財叔當年四處塗鴉，又唔見到有幾多人出來撐佢，照顧吓佢生活，反而有人不時投訴佢塗鴉公眾地方，搞到佢時常畀差人招呼。 哦！宜家財叔仙遊咗，遽然升level，之前塗鴉立刻變成文化藝術，佢老人家泉下有知就真係唔知感激抑或搖頭。 小弟不期然想到另一個人，就係荷蘭畫家梵谷，佢生前醉心繪畫，但就無人欣賞，試過有次想將一幅作品同一間餐廳換十五個法郎，想食一餐豐富些小，但都被拒絕。 佢在世之時只係成功賣出一幅畫，仲要係佢親細佬幫佢購買，可謂慘情。 在當時人眼中，梵谷係一個有精神病嘅所謂藝術家，根本無人睇得起佢，終於佢四十歲未夠就自殺。 但當佢死後，作品升價何止倍數計，直情以幾何級數計算，部分作品仲擺放在國家級博物館。 至於但凡有作品拍賣就隨時以百萬美元叫價。 何解生前與身後有天壤之別呢？講穿咗其實咪又係人為炒作！真係有咁多慧眼獨具嘅欣賞者咩！況且抬高其身價分分鐘亦可令自己受益，道理其實很簡單，試想一吓，若然手頭有佢作品，無論金錢價值或個人品味地位都會大大提升。 宜家大力吹捧曾灶財「墨寶」嘅香港人不妨捫心自問，你哋真係咁欣賞？抑或另有目的呀？ 作者：葉家輝，退休警察 原圖：港台視頻截圖 http://paper.takungpao.com/html/2012-11/19/content_15_5.htm