廣東話有句俗語講得好，大話怕計數。話說昨日泛民黃軍敲鑼打鼓成立「在囚抗爭者支援基金」，當日即被本俠踢爆條數唔啱，明明反東北十三太保加雙學三犯安家費合共只需183萬，點解要籌400萬咁多？多出來嗰二百幾萬邊個袋？背後會不會藏了什麼陰謀？ 諗來諗去…隻抽俠腦中忽然閃出一個名──戴耀廷！

戴有車有樓住千幾呎豪宅

嗱大家都有眼見，黃營支持者對班年輕佔犯的同情，明顯就高過戴耀廷等始作俑者。現時會不會有背後老闆唔想科水，所以想借16少年犯吸引到的一些同情心，先收未來錢，用公衆的錢找人情債，畀埋佔中三子嘅安家費？ 都知戴耀廷有車有樓，住在值千多萬的千幾呎豪宅，在港大更有高職，叫大家捐錢給他，肯定犯眾憎。陳健民及朱耀明也是有米之人，但一旦出事判入獄，金主怎能側側膊？自己唔想畀，叫人捐又核鬼突？咪一於借班年輕人過橋，用楚楚可憐何潔泓同雙學三犯的名義借艇割禾，順道籌埋戴耀廷嗰份？ 嗱隻抽俠話黃營支持者同情雙學三犯唔同情佔中三子，不是沒有根據的。

黃營支持者都覺得佢抵死？

回帶8月17日，黃之鋒、羅冠聰及周永康下午四點半被判入獄至黃昏七點，黃營宣傳總部《蘋果日報》Facebook有關帖子【雙學三子被改判囚6至8個月】上錄得過萬個表態，包括6146個嬲、2968個慘及1551個Like。 對比3月27日當局起訴佔中三子，《蘋果》專頁上的報道儲足整個星期才有5,477嬲，平均每日不足一千個，顯示他們獲得的同情遠遠不如那三個學生。 再睇Like佔中三子被告者竟然也高達2127，似乎連黃營支持者都有不少認為他們抵死？

區區幾百萬元金主點解唔出？

既然覺得抵死，仲點會繼續捐錢？唔借年輕人過橋點得啊！ 但那區區幾百萬元安家費，點解做大佬的黎金主自己唔出叫市民出？真係諗吓都覺得諷刺。 原圖：無綫新聞截圖

投票已截止，多謝支持