今日帶大家去拉麵，呢間位於沖繩國際通內一條唔起眼既橫街，但係又好出名既拉麵店主打黑蒜麵。價錢仲要唔貴的，大家可以試下，好食架！ 典型日式食堂既裝修，牆上面仲貼左香港旅遊書既介紹添。但係我又唔覺好多香港人黎食咋喎，我諗係位置既問題，呢度唔易搵的，轉頭再講。 拉麵有四種，我老婆揀左黑蒜，我穩穩陣陣食豬骨拉麵算。 最後講下點樣去琉家喇，最近既單軌站係県庁前站，行１０分鐘就到，如下圖： 從県庁前站行出黎，照舊見到國際通入口轉入去，靠御菓子御殿嗰邊既行人路行，行到咁上下有條小巷，留心睇下，地下有塊告示版的，咁你轉入去行到尾就會見到。 上圖係御菓子御殿，外貌咁特別，好易認。沿呢邊行人路一路直行，去到一條小巷就會見到下面塊告示版。 地址：沖縄県那覇市松尾一丁目６－８ 下一集，筆者會帶大家去沖繩既廚房，牧志公設市場食海鮮！仲會講埋你旅遊書教錯你既野，等你唔會比人呃，星期日晚見。 P S：沖繩篇快將完結，原本打算講關西篇，介紹下香港人常去既大阪同京都等地。但係睇番之前大家既留言，始乎ＨＫＧ報既讀者唔太喜歡日本咁喎，所以筆者請大家比下意見，你地想睇關西篇定還是想我寫台灣篇？台灣篇的話，我會由高雄開始寫，直落介紹埋墾丁，同埋我朋友間民宿，仲會教埋你搭共乘的士添。大家只要喺Facebook留個言比我，話我知你想睇乜野就可以，感謝各位。 圖：由作者提供，地圖及街景地圖取材自谷歌地圖