今屆巴黎奧運會，無論係國家隊定係港隊都拎到驕人成績，吸引海內外媒體爭相報道，有一段小插曲大家未必有特別留意——喺8月2日嘅羽毛球男雙金牌戰中，有嚟自台灣地區嘅球迷，因手持寫有「TAIWAN」嘅毛巾，畀大會工作人員沒收，亦有人因展示「台灣加油」標語，被工作人員要求移步到後方溝通，更一度同其他球迷發生爭執，過程中有所拉扯。

台灣方面當然唔高興，第二日即刻抗議，話有「惡意人士」以「粗暴卑劣手段」搶奪標語，違反咗奧運所代表嘅文明精神，更悖離法治同侵害言論自由。

乜嘢係奧運精神？翻查資料，國際奧委會曾解釋係「要求在著重友誼、團結和公平競爭的精神下達致相互理解」。唔知大家係點樣理解呢句說話，但我自己就睇唔到當中有話容許宣揚「台獨」。

台灣地區之所以可以參加奧運，全因1981年所簽署嘅《洛桑協議》，規定咗「中華台北奧會」只可以使用「中華台北」（Chinese Taipei）名義參賽，會旗、會徽、會歌等，都有嚴格規範。一係就唔好參加，既然參加咗，就要接受自己只係「中華台北」嘅事實，條款寫得清清楚楚明明白白，就算走去搵美國乾爹喊苦喊忽，都唔會有任何改變。所以如果要講法治，台灣肯定輸咗，既然法治呢個前提已經唔成立，咁亦都唔需要再講咩言論自由喇！

本費Ching自然唔會講咩政治還政治、體育還體育嘅天真說話，每當國家隊對上港隊，又或者係國家隊對上中華台北隊嘅時候，從網絡上嘅討論風向就可以睇得出，總有一班謀獨分子特別興奮，或者係因為自知所妄想嘅事，永遠都只能係妄想，唔會成為事實，唯有將妄想寄託喺賽場之上，假如有一個萬一，真係成功贏到國家隊一仗，就好似自己嘅心願已經達成咗咁樣。若只能以「中華台北」之名擊敗國家隊，喺台獨分子嘅眼中，自然係爭咁啲嘢。

近年台灣地區年輕人趨向投獨，少不免因為綠營政客推波助瀾，鼓吹兩岸仇恨，雖然奧運會從來都冇辦法同政治分離，但若果可以減一點政治成份，相信體育賽事將會變得更加純粹同美好。畢竟，奧運會嘅初衷係促進國際間嘅友誼和理解，而唔係成為政治角力嘅舞台，更加唔係謀獨分子出場嘅舞台。

（文章純屬作者個人意見，不代表本報立場。）