當一個人做跟班太久，自己會不知不覺拋掉尊嚴與自主，國家亦一樣，日本同韓國就係好例子。

1月中旬，日本首相岸田文雄到訪美國白宮，同美國總統拜登舉行首腦峰會。兩個密密斟完之後，跟手就有N咁多個協定同合作方案出台。就在大家以為兩大文化輸出大國有何創造性合作，原來講來講去兜完個圈又係講緊中國。

日本作為契小弟，要拜會大哥，大家明白；日本自從被美國打殘一次又一次，已經完全淪只會跟隨美國的「羊」，大家都明白；但世人睇住日本寧願死黐美國，喺農曆新年前徹底針對中國同中國旅客，令國內商界再食唔到「政冷經熱」嘅果子，大家就唔多明白喇。

眼見岸田對住記者春風得意嘅樣，好似明星巡迴演出咁，去完英國，去加拿大，最後壓軸留畀美國，實行資本主義陣營圍爐取暖，人人有份，永不落空。岸田老哥，你唔會以為靠呢件偽民主泥菩薩，就可以挽救水深火熱嘅日本呀嘛？

喺到白宮之前，美國同日本兩國發布所謂嘅聯合聲明，話全球進入「戰略競爭新時代」。兩位領導人討論嘅一系列地區和全球問題，其中多個方面涉及到中國嘅利益。

其實早喺訪美前嘅11號，岸田文雄同英國首相辛偉誠簽訂《互惠准入協定》，英日之間嘅防衛合作將大幅加強，例如英國軍方可同日本自衛隊進行聯合軍演以及軍事部署；仲有一點畀位英國入嘅就係，英國可以藉此派遣軍力進駐日本！嘩，日本為咗等美英等國插手東亞乃至中國有關事務，不惜國門大開，呢種無私奉獻嘅精神，都咪話唔令人感動！

至於韓國，係人都知佢同日本關係麻麻，但韓國有個奇特嘅動作，似乎都要同日本搞好關係喎。日韓之間存在冇數講嘅歷史矛盾，但佢哋有同一個美國大哥，大哥叫你合作你敢唔合作？日韓一齊聽美國支笛搞中國，一啲都唔會令人驚訝。

真正震驚世人嘅係，韓國政客連民族死仇都可以放低。你睇，韓國教育部甚至打算刪走教科書有關日軍慰安婦嘅內容，唔知係咪要同美國交差、同日本示好呢？唔知，亦都唔知韓國政府坐住個腦諗緊乜，更加唔知韓國之後仲有幾多討好日本嘅小把戲。總之，連尊嚴都可以唔要，韓國你係得嘅！

正所謂「武大郎撚雀」，甚麼人玩甚麼鳥，美國品格咁高尚，眷養嘅政客同國家自然唔會好得去邊。

原圖：President Biden Twitter圖片

https://twitter.com/POTUS/status/1613981715256512513/photo/1