黑暴土崩瓦解後，掀起所謂「移民潮」，唔少不甘「革命」失敗嘅黃友，口口聲聲為追尋「自由」而離開香港，遠至英國、加拿大、澳洲，近至台灣，只要有國家或地區肯為黃友移居提供便利，佢哋就會驚死執輸咁一窩蜂衝過去。至於那個地方適唔適合？去咗會唔會中伏？似乎都唔係佢哋優先考慮嘅因素，抱住「到時先算」嘅心態衝動移民，通常都係撞板多過食飯。有已經移居台灣嘅香港人YouTuber就親身示範，點樣被蔡英文政府跣到攤攤腰。

住喺台灣嘅港人YouTuber「珍心活」近日喺頻道拍片宣布，話兩年前舉家移居台灣嘅佢，依家要決定離開當地，原因係用咗兩年時間都仲未攞到台灣身份證，即使「好認真打拼想融入當地」，但因為台灣政府對港人移民的「政策不確定性讓人無所適從，能感受到呢種無奈」，最終放棄定居台灣。

佢仲透露，本來台灣當局話一年時間就可以攞到身份證，但政策不停改變，而佢哋一家又啱好係舊制嘅「尾班車」，移民要求相對較模糊。佢舉例，有做貿易生意嘅移台港人，同樣係舊制度，每年做幾百萬台幣生意，結果要觀察多一年先知攞唔攞到身份證。仲有開實體店，有聘請台灣人嘅港人僱主，表面上合乎所有條件，結果都係要留待觀察。佢不禁反問，「標準喺邊？好模糊、好唔確定」。

本俠翻查資料，據台灣移民署公布統計數字，舊年（2021年）有11173名港人獲居留許可，比前年（2020年）增加咗360人，但只有1685名港人獲定居許可，比前年僅增加咗109人。可見，申請移民嘅人多，但批准定居嘅人少，對於大多數追尋「台灣夢」嘅港人嚟講，可能結果就係夢碎了一地。

回想當年蔡英文借反修例風波抽水呃選票，假仁假義宣稱「撐香港、關心香港，畀香港人最大嘅支持同聲援」，但實情只係將香港黑暴視為操弄台灣民情嘅踏腳石，從中撈取政治利益，幫助佢登上最高權力寶座。

當對住果班誤信謊言，真係打算投靠台灣嘅手Joke，蔡英文政府就設置重重關卡，阻礙佢哋定居台灣。黃友自以為係蔡英文「並肩作戰」嘅戰友，但諗唔到其實只係佢過橋抽板，用完即棄嘅棋子，一時衝動移居台灣，結果搞到兩頭唔到岸，真係喊都無謂。

其實只要諗深一層，依家台灣並唔好景，爭飯碗都爭崩頭，仲邊有資源接收你哋班難民呀？以為去到台灣可以搵到自由嘅「小確幸」？點知誤墮移民陷阱實屬不幸。真係恭喜晒喎！

原圖：蔡英文Facebook圖片