俄烏衝突未有消停跡象，烏克蘭軍事、經濟已遭受重創，數百萬人流離失所，原本以為美國等西方國家會出兵相助，豈料關鍵時刻個個縮沙，令烏克蘭陷入孤軍困境，連烏國總統澤連斯基亦仰天長歎，「西方領導人已經解散了！」

但可能連澤連斯基都唔知道，原來遠在太平洋之濱嘅香港，有班人竟然熱血到敢做美西等國都做唔到嘅事——協防烏克蘭！

話說近日網上討論區有一貼文引發熱議，發帖人聲稱，鍳於烏克蘭國防部邀請外國公民加入協防，形勢緊急，恕在下冒昧臨時擔當港籍軍團召集人。仲好正式咁有埋分工，「本人會負責行政, 統籌及與烏克蘭當局保持聯絡，務求提高效率。希望有志為邦國解燃眉之急嘅香港人從申請到抵達都可順利成行」云云。呢名發帖人仲話，若成團就會公開真實身份，仲會同大家update最新情況喎。

講得似層層咁，但點知......個計劃唔夠一個鐘就Cut咗啦！點解咁流嘅？原來發帖人出post之後先發現漏咗一樣最重要嘅嘢：原來唔記得問清楚烏克蘭果邊需唔需要「港籍軍團」幫手，話「send咗封email比烏克蘭領使等緊佢回覆，問清楚先再決定搞唔搞」，所以要「暫停計劃先。」喂喂喂，唔係啊嘛？有手Joke已經準備報名啦！

有自稱喺台灣讀緊書嘅手Joke話，自己認真好想加入，認為「人始終都有一死，但只要死得有價值，有意義，咁就無怨無悔啦」，仲叫發帖人幫手問吓「佢嘅情況可以點申請？」

點知發帖人話遲遲等唔到領使回覆消息，仲估估吓咁講，緊急關頭唔洗點申請，直接飛去波蘭再入基輔就得，搵埋當地嘅香港人就一起行動啦！咦，你簡直神勇過雷霆救兵，無槍無裝備，赤手空拳就話衝入戰場，真心佩服呀！

有心水清嘅網民就話，「咪玩啦，又搞臭香港人個名！」，亦有人揶揄呢兩位仁兄簡直係「世界領袖咁嘅級數喎！」更有人一針見血指出，「仗就其他人打，彩就你拎晒？！」

呢班黃色鍵盤俠，烏克蘭就肯定去唔成，但故事嘅結局大家又估唔估到呢？當佢哋被人笑到下巴都甩嘅時候，發帖人竟然設計咗個臂章，話要送畀去烏克蘭協防嘅香港人喎，叫手Joke出發前print幾張出嚟貼喺身，「以防被誤會係中國人，同埋易啲搵返自己友」，仲懶沮喪咁話「能力範圍內暫時只做到依啲」。哈哈哈，黃友笑話中你都算係經典啦！

黃人愛發夢係人都知，但估唔到發完港獨夢，又發保衛烏克蘭夢，雖然係夢，但都唔好咁離地呀！本俠有時都諗，點解黑暴咁荒謬嘅事會發生喺文明嘅香港？咪就係多得你哋呢班夢想家囉。其實黃人嘅邏輯真係好奇怪，可以肆意破壞自己嘅家園，一言不合就私了自己嘅同胞，但就口口聲聲宣稱，要仆去守衛一個相隔萬里、同自己三唔識七嘅國家，真係話你傻豬又怕你嬲，話你天真又講唔出口。

原圖：素材網