早輪睇到單嘢，有黃人拎住大拿合4萬銀(係港紙，唔係英鎊)，就打算移居英國，雖然話窮唔係罪，但係家陣移民喎！唔係去歐遊流浪，4皮嘢，真係夠咩？呢位仁兄九成都係誤信網絡謊言，以為真係幾皮嘢夠做英國紳士，結果就緊係領嘢啦！手上啲錢唔知夠唔夠使到佢搵到工，唯有好阿Q咁呃自己，當地用26英鎊可以買到3日餸，真心平咁話！一條友買餸煮飯平均每日要一百港紙都話平？睇嚟佢喺香港應該冇乜行街巿。

不過佢都未算慘，起碼有手Joke送暖，叫佢加油，話一定得，仲陪佢阿Q咁話佢手上啲錢好好使。呢啲咪世間情囉！唔似得早輪有個手Joke，佢同樣係窮走，仲拎咗1皮嘢，大拿拿5萬銀咁過英國，不過佢悲哀呀！話誤信連登仔，以為拎住5皮嘢同個喼就可以移民做歐洲人，點知中晒伏，租地方冇信用保證要畀足一年租，疫情下行政過程慢到冇朋友，申請文件冇著落；冇地址證明搵唔到工；食飯貴、貴、貴；天氣又潮濕，啲衫晾唔乾搞到冇衫著。

放負犯禁遭圍插

移民黃人網絡界唔畀負面情緒㗎嘛！結果佢就被網友圍插，話佢做假，問佢做乜唔同人夾租、住share house，又言之鑿鑿咁話室內晾衫一樣乾，不過要晾幾日咁解啫！最誇張嘅係有人話用2英鎊已經可以食6餐！總之就唔可以話走佬唔得、唔啱、唔掂啦！

老實講，想走嘅人，留到佢嘅人都留唔到佢嘅心，咪由佢走囉！但係用盡方法唱好，唔畀人講現實中嘅移民慘況，有呃人走之嫌，似乎唔係咁好！想走佬嘅黃人，你哋自求多福啦！