有時聽黃友嘅奇談怪論，真讓人大開眼界，不禁「佩服」佢哋嘅常識及邏輯。近日網上有討論區流傳一則名為《香港建立軍事力量，要點做呢？》嘅貼文，引起不少熱議，發文者大談香港獨立建軍嘅必要性，仲似模似樣提出整套理論同實操方案。

譬如，呢位黃色軍事家喺文中呼籲手Joke，如果喺海外嘅話，就要加入所在國家嘅軍隊，成為訓練有素嘅合格士兵，以後就可以返嚟香港武裝力量，指揮一啲臨時集結、缺乏訓練嘅手Joke，到時就可以組成一個兵團啦。但手Joke仆住咁移民都係為咗追求想象中嘅「自由」，你叫手Joke加入外國軍隊，受軍中紀律約束，咁咪又失去自由？情何以堪呀！

呢位黃色「軍事家」仲指出，佢哋唔排除實施恐襲，但建軍係為咗長遠嘅將來，「為咗可以有效控制香港，維持治安，維持統治」。佢仲解釋，建軍同恐襲係唔同時期嘅需要，假如建軍失敗就要考慮恐襲喎......哈哈，講呢啲，你真係心口掛個勇字喎。

呢番建軍偉論竟有唔少手Joke附和，有人留言話「同我諗嘅一樣呀」；更有人獻計，要假裝順從中央，「做一個愛國嘅中國人」，咁就可以自薦加入解放軍，協助中央「解放台灣同南海被佔領島嶼」，等到時積累咗實戰經驗，又喺軍中手握大權，「等中央勢弱就係獨立之時」云云。

呃......本俠認為，呢位手Joke唔多熟中國徵兵制度喎，首先，目前全國徵兵地區暫不包括香港；再者，加入解放軍需要政治審查，仲要識講普通話，請問黃友過唔過到關先？

至於未來嘅黃軍點樣訓練，「軍事家」就話，要組團搞軍訓喎，而軍訓嘅內容唔一定要係打War game，行山camping都得架，主要係培訓互信同默契啫。咦？原來識行山camping就等於識打仗？黃友嘅邏輯果然超凡脫俗！

有心水清嘅網民就留言指出問題關鍵，「一定要課咗金先，唔課金就乜都冇啦」。係囉，成份計劃書吹到天花亂墜，原來唔記得最重要果樣嘢！咪話買軍火啦，手Joke移民當兵、行山camping樣樣都要錢......冇錢？睇下有冇人睬你先！

呢班黃友可能連槍都未掂過，就學諸葛亮提「隆中對」指手劃腳，簡直好似聽緊《笑傲江湖》中桃谷六仙嘅對話一樣，被人笑到面黃。最後順帶提醒一下，當你哋策劃緊「天衣無縫」嘅大計之時，請別忘記，香港國安法已於2020年6月30日正式生效！

原圖：星島日報

https://std.stheadline.com/realtime/article/1622503